「新亨利」安東尼馬迪爾 (附影片) 精選

過去的，已經過去，對於雲高爾對曼聯的影響，兩位編輯心入面都有啲嘢想講，不過呢個留返之後再談，等轉會窗關閉之後再好好理清諗法…不過，筆者諗大家對呢位人兄應該有興趣，所以先同大家介紹一下佢。

呢一位係19歲嘅小朋友，剛剛同法國國家隊匯合又要短時間離隊，因為連法國足總都話，教練甘斯已經放人畀佢去英國傾轉會，一切手續完成之後星期二仲要飛返去克萊楓丹訓練營繼續同國家隊操練。佢係邊個？佢就係有新亨利之稱嘅安東尼馬迪爾（Anthony Martial）。其實幾方面都睇得出佢已經一半成咗魔，一方面有法國足總的講法支持，而且雲高爾咁放心外借贊奴沙、出售小豆，將手上所有佢口中的前鋒牌一次過放走哂，可見會有一位攻擊球員加盟，馬迪爾應該就係呢一塊拼圖了。
被譽為新亨利嘅佢，究竟有咩過人之處，甚至評價比贊奴沙、小豆更高？首先講少少佢嘅生平，細細個佢已經喺里昂青訓長大，都為一隊上陣過3次咁大把，不過風評已經唔錯，13年以3600萬鎊轉會到摩納哥。第一季佢表現都係麻麻，不過第二季就有起色了，在摩納哥主帥渣甸的麾下有唔少上陣機會，各戰線上共攻入11球，而且早早已經加入法國國家隊u16隊中，直到依家。

呢位小朋友各方人士都評價唔錯，好似摩納哥主席卡連遜就形容佢為：「走位聰明、控球精妙，而且有全面的腳法。」，更稱他有能力可以令球場上的一切變得簡潔。作為一個前鋒，佢門前嘅冷靜亦唔似一位20未到嘅小伙子，one on one嘅能力好強。不過相比起來，可能因為年紀問題，穩定性似乎有待改進，而且前摩納哥領隊雲尼亞里就認為法國球員心態上有啲古怪，成日諗住「我今場打得好，下一場都可能會打得好啦！」積極性上嘅缺憾似乎安東尼馬迪爾都有，睇嚟要好好咁學習一下。
至於佢嘅前輩，咁都打過摩納哥，佢都話自己有同「老虎」學嘢：「我曾向法卡奧學習，亦有向紐卡素的利維亞尼學習。佢嘅走位真係一流，對我好有幫助。我要好好學走位，學攻門，可以日日見到法卡奧、利維亞尼對我而言係好有幫助。」不過當然啦，佢最為人所熟知，就係「新亨利」之名喇，因為佢嘅打法又似似哋亨利，加上又係摩納哥前鋒，同亨利有啲啲似啦…19歲，3600萬鎊，新亨利…雲帥，你都幾大膽……

安東尼馬迪爾
1995年12月5日出生 (19歲)
1.81m高
法藉前鋒
https://www.youtube.com/watch?v=495xcuZI0Ig