曼聯專區小評：紅魔兩大關鍵殺手(附迪比精華) 精選

睇完昨天晚上對布魯日的比賽，當中有幾點非常值得大家一睇，因為佢哋隨時係今季曼聯成功與否的重點！

第一點，講衰嘢先，就係朗尼態沉依舊…計埋今場，朗尼的入球荒已經去到9場波喇。單睇數據，如果計哂場上所有正選球員(唔計中場退下火線的卡域克)，朗尼嘅觸球數字係咁多位球員中最少嘅…雖然充其量都可以話佢爛船都有三分釘，因為佢都叫有一腳神來之筆，後腳交波予迪比攻門，只係唔入…然而長此下去，朗尼作為曼聯現時唯一單箭頭(小豆表明只是第二前鋒)，無法成為穩定入球者的話，佢喺曼聯嘅位置都真係有啲危險…
另一邊廂當然就係今仗的絕對功臣迪比喇。3個入波都關佢事，自己入夠2個兼有靚助攻，而且喺佢身上我哋見到久違了嘅「改變戰局質素」。如果要數能改變戰局之人，除了當年的C朗之後，可能就要數到第一季加盟曼聯的雲佩斯。佢哋嘅入波往往睇到人眼都定埋，往往可以將唔可能變成可能。好似迪比，第一球佢用哂胸、頭控球，再一記割草式射波，以21歲之齡有如此純熟腳法，佢絕對有能力成為曼聯的明日之星。而助攻費蘭尼的一腳長程助攻，亦顯示此子自由球、傳中能力不弱（其實佢遠射都好勁！），可以成為另一個曼聯殺著。所以話，呢位荷甲神射手唔係浪得虛名，適應咗英超之後真係非同小可！

不過有一位球員嘅重要性，喺呢場波就再一次出現喇，佢就係爆炸頭費蘭尼！可能有啲廢話，不過一隊球隊有時真係要有幾個面相，好似以前嘅曼聯都唔可以只打碧咸自由球同傳中戰術，好易就被mark死；佢都要有傑斯做速度突破先可以達成平衡。而依家曼聯都係，朗尼同無咩機會出場嘅小豆唔作評論，下下都靠球員用速度做突破都唔可以用足一世。有咗費蘭尼「呀呀炸炸」、又高又阻住哂，曼聯就可能打多一瓣高空波喇。最後一個頭槌入波，就睇得出佢有幾重要，尤其係聯賽賽事當中一定會碰上唔少僵局，對住鐵桶陣、10人防守，自由球、角球配合高空攻勢就係其中一個打破戰局的重要手段。（迷之聲：唔好同我講9981斬重現江湖呀，此一時彼一時，家下點同當年只得一板斧！XD）
總結係，朗尼雖然銳利度不足，不過尚有唔少攻擊點曼聯可以發揮，要好似曼城咁場場大勝就真係難架喇，每場波少少哋一、兩球應該無問題嘅！總唔可以放太多壓力畀迪比同費蘭尼…

小數據：
近年來為曼聯一場歐戰內入2球、助攻1球的，有C朗(2009年)、朗尼(2013)、同埋迪比(2015)
迪比過去30個入球入面，有9個都係禁區外射入。拿，都話佢遠射好架啦！
今仗曼聯攻力比英超比賽時強，共19腳攻門、8次中龍
shit。

https://www.youtube.com/watch?v=FD4KZIq5d2A欣賞下~~