托利斯：柏度可在曼聯取得成功 精選

迪馬利亞走咗之後，大家都認為曼聯應該要有多一位攻擊球員，而對柏度的興趣亦已經不脛而走。對於佢加入雲高爾的麾下，咁就真係人人都有自己睇法，有人支持有人反對，不過王子費蘭度托利斯就係贊成嘅一個。

佢咁講：「作為佢嘅好朋友，如果佢決定轉戰英超的話我會認為佢可以取得巨大成功。打咗巴塞咁耐，佢有齊好球員要有的能力，而且其工作態度亦非常好。佢好努力訓練自己，佢會助攻兼助守，又唔會好易畀人壓逼，佢有齊喺英超成功的本錢。係，我明白，要佢離開巴塞真係唔易，不過我比任何人都明白可以有正選打係幾咁重要，尤其係已經有一定年紀嘅時候。你會好需要一隊可以畀到大量正選時間你嘅球隊。」
其實上一仗對熱刺，大家都有眼見曼聯的問題其實未曾改善，單位數字的攻門數量、只得一腳的中龍，攻力不足唔單止影響了球隊，亦令喜歡攻勢水銀瀉地嘅球迷好傷心…你話有迪比、朗尼夠唔夠？朗尼好明顯不在狀態，而迪比自己亦唔係太適應自己的新位置，有柏度係唔係可以幫到手呢？走位靈活嘅柏度可以帶出更多空間畀朗尼、迪比發揮，定係用返費蘭尼撞散對手的防線更為實際？

以上問題可能未有答案，而筆者可以講嘅就係，如果要比較同樣都係翼鋒的楊格，柏度會有更多殺著，走位佢幾好、帶波扭波都唔錯，腳法的靈巧亦在楊格之上，最無獨有偶，2人都係右腳仔但打左路比較好…柏度來投對剛剛續約嘅楊格真係有啲威脅架！