「逐夢者」馬菲斯 (附其世盃入球片段) 精選

新兵入面，大家對佢可能期待唔細，不過認識亦可以唔多，見到印住Memphis嘅波衫，好多人都問：邊個嚟架？青訓嚟？有住黝黑皮膚嘅佢，就係荷甲最受注目嘅新星之一，亦係雲帥今季嘅重點收購：馬菲斯迪比（Memphis Depay）。

或者同大家講下，迪比就迪比啦，點解印名唔印Depay 要印Memphis呢？呢個同佢嘅身世有關，作為荷蘭人佢真係黑咗少少，又唔太似歐洲人，因為佢其實係混血兒，爸爸係加納人、媽媽係荷蘭人，所以黑黑實實嘅佢成年之後有得揀加入加納國家隊定係荷蘭國家隊。不過佢父母離異，爸爸喺馬菲斯4歲嘅時就離開咗屋企人，所以馬菲斯亦唔想大家叫佢「迪比」，背後亦唔再印姓而印名。雖然馬會又好、體育傳媒都好，仍然都叫佢做「迪比」，不過專區無咁正式嘅，既然都係個人選擇咯，我哋就一於順佢意，之後都叫佢馬菲斯啦！
講起馬菲斯，佢除咗以唔係前鋒身份，於上季荷甲攻入25個入波而聞名之外，佢身上面啲紋身都好鬼出名！而佢最為人津津樂道嘅，係為自己起嘅外號「逐夢者」Dream chaser，仲紋正喺自己心口。佢接受訪問時都提過呢個名：「我相信我係世上最好嘅球員之一，而我要有呢個夢想、要努力去實現，所以追呢個夢嘅我正正就係『逐夢者』啦！我紋咗佢喺心口架，仲要日日努力先可以完成夢想。世界盃之旅係我實現夢想的開端，由我入2球開始。可以成為荷蘭國家隊最年輕的入球者，我真係好開心。不過世盃完咗，我知呢個只係開始。我要在球場上更努力先得。於世盃入波感覺良好，不過我知呢個只係開始。」

對於雲高爾，佢就好似馬菲斯另一位爸爸一樣：「雲高爾係一個偉大的領隊，佢可以令球員變得更強。我每次同佢操練之後，都感覺自己進步咗、強壯咗。佢好唔同，在訓練場上佢同任何教練都唔同，世界盃之後佢要我stay hungry，所以我同自己講我要咁做。所以當我上年決定咗留隊喺燕豪芬，我就決定要成為冠軍、成為金靴。我為自己定下目標，而且決心完成佢。可以再同佢合作、一齊訓練真係好開心，好期待。我總係聽到人講英超，呢個真係一個大夢想，不過呢個已經唔係夢，而係我嘅新開始。」
而呢位21歲嘅小鬼頭，野心其實一啲都唔細，誠如雲帥教佢嘅stay hungry一樣非常渴求：「老實講，我當然想成為曼聯的傳奇。我會畀自己適當壓力，要場場都打得好。我仲好後生，可以再進步，不過英超同之前都唔同，我哋睇下啦！我有自己的工作要做，可能在某一個時刻就可以成為傳奇啦。唔係我叫自己做傳奇，係由粉絲、同埋其他曼聯傳奇口中得到『傳奇』呢個稱號！」
https://www.youtube.com/watch?v=CKv5HqtCD0w馬菲斯世界盃入波https://www.youtube.com/watch?v=UwvOED1RwLQ簡介
Dream chaser