唔買唔「舒」服！新目標：舒尼達連

人哋出哂手喇，曼聯呢？利物浦買咗法明奴、留意好耐嘅尼達利基尼又去埋；那邊廂阿仙奴又要走咗施治，爭體測未過……曼聯呢？得個未必可以一嚟就夾到嘅迪比，真係「咪摩」咗啲噃…不過近呢兩日就多咗個傳聞目標，佢就係法國中場舒尼達連（Morgan Schneiderlin）。

2008年舒尼達連以120萬鎊加盟仲未升上英超嘅修咸頓，打足250場比賽、攻入15球，喺英超嘅表現都幾好！而傳聞呢個轉會好可能高達2500萬鎊甚至更高，就睇傾成點喇。舒尼達連自己就話同緊球會傾：「我哋仲傾緊，呢幾日應該有結果架喇。希望在聖徒的季前訓練開始前可以確定我嘅未來啦，即係下星期之前！」
言語間佢都表示自己唔一定要離開修咸頓，只係要走一定要為歐聯而走咁話，而家下就有起碼2間身負歐聯資格嘅球隊想要佢，分別就係阿仙奴同曼聯喇。睇上季表現，似乎就係阿仙奴好啲嘅，不過講到上陣機會喇wor，似乎曼聯應該就多啲，阿仙奴中場大不乏人，同韋舒亞、高基連、藍斯等人爭正選都真係唔容易，反而曼聯呢就只係得靴里拉、卡域克比較出色，後者畀人當神咁拜但係傷病頗多、年紀亦唔輕，代替佢出陣機會應該唔少。如果有得揀？曼聯應該佔先嘅！