傑斯：做領隊要改變心態 精選

心繫紅魔嘅曼聯長青樹、41歲嘅傑斯在雲帥麾下都做咗副教練一年喇。佢最近接受訪問時，都談及自己呢一年以來面對啲咩噃。佢咁講：「做球員同做教練其實都好唔同，最大嘅改變係你要學習唔好用球員的想法去睇比賽，而要用教練嘅諗法。作為球員其實可以『自私』好多，你想做好好容易，知道自己可以做到咩、點去做就夠。做教練你要喺要引發25個球員，甚至係30個球員嘅潛力，令佢哋做到最好。」

而佢就認為依家嘅曼聯只係欠缺一樣嘢，就可以「中興成功」：「我哋今年證明咗我哋有能力同聯賽最強的隊伍一拚，只要加強隊伍穩定性就可以有好成績。如果我哋季初可以打出好表現，我認為我哋一定可以挑戰冠軍。」上季曼聯對強隊時的水準其實唔錯，反而係應該得分的時候失分，好似對李城、愛華頓、西布朗同史雲斯都失分，外間好多評論都認為曼聯係對住死守的球隊無乎，因為創造力同突破力都唔多夠，於是無法應付「鐵桶陣」。今季雖然有迪比呢位強大翼鋒加盟，不過睇嚟仲要多幾位球員先叫「齊章」，始終都要有個突破力強嘅球員、有多位強大中堅幫助防守，而卡域克嘅接班人亦都有需要搵一下。最近轉會窗都無咩新消息，睇嚟高層們要落啲力先得喇！