朗尼、菲臘仔齊撐哈利卡尼「入魔」

曼聯專區 於 15/06/2015 發表 收藏文章
講到曼聯嘅吸引力,其中一定唔少得個陣「英國味」,隊中一向都喜用本土球員為重心,好似當年嘅碧咸、史高斯,之後嘅朗尼、卡域克、里奧,紅魔鬼陣中點都會有幾位英格蘭核心國腳,本土味十足。家下當然都仲有朗尼、鐘斯呢幾位重要三獅在陣啦,不過就連朗尼同菲臘仔都認為唔夠,想要多個噃!呢一位,就係熱刺陣中最當紅的前鋒哈利卡尼喇。

講熟悉哈利卡尼,英軍拍檔朗尼就當然係其中之一啦。《太陽報》、《鏡報》等等幾個傳媒都話朗尼親自同雲高爾推薦哈利卡尼,認為佢同哈利卡尼於國家隊的默契可以帶到去球隊咁話,仲講到自己已成為佢粉絲喇。一個朗尼、一個卡尼,代表住英格蘭新舊2代的攻擊核心,佢哋可以聚首一堂、夾慣夾熟,對於國家隊的表現都會有裨益,睇嚟英軍主帥鶴臣都會對呢個轉會舉腳支持啦!

而菲臘仔亦認為哈利卡尼好啱打曼聯:「上年哈利卡尼真係打得好好,我都好喜歡睇佢踢波,喜歡佢比賽嘅方式。佢好努力,而且為人無懼,所有攔住佢前面嘅問題佢都會逐一破解。對於曼聯而言,我哋總係需要英國球員成為骨幹,到依家都仲係好重要。有本土球員,我哋隊波先有『英氣』,呢個係球會咁多年來成功的關鍵之一,我希望可以延續落去。哈利卡尼一定好貴,熱刺亦唔會想失去佢,不過無咗法卡奧、又有歐聯比賽的情況下,單單依靠雲佩斯、朗尼同占士威爾遜真係唔多夠,多一位高質前鋒先得。哈利卡尼絕對係呢個問題嘅答案。」

據英國多家媒體估計,要買到哈利仔的話最平都要4000萬英鎊,老老實實,真係唔算貴喇!只係熱刺肯唔肯呢?呢個就係後話喇…拿,依家就有個荷甲年青神射手迪比加盟,如果再加多個英格蘭年輕高產前鋒,配合上前一代高產前鋒朗尼、現世代助攻之王迪馬利亞、直線狂魔靴里拉同濕水欖核馬達,入球數字應該會幾嚇人!

標籤: 朗尼  哈利卡尼  

留言


請按此登錄後留言。未成為會員? 立即註冊
  • kinfung 於 15/06/2015 評論 NO. 1

    直線狂魔、現世代助攻之王、濕水欖核😂😂笑撚死我呀頂😂

  • thshek 於 15/06/2015 評論 NO. 2

    上季季前都係咁講,之後la窩...

快捷鍵:←
快捷鍵:→