里奧掛靴了 精選

有時轉投敵對球會，對球員、對球會都有唔少壓力，而曼聯陣中其中一位加盟時備受爭議的，一定要數佢：列斯聯來投的里奧費迪南。然而6奪英超、1次歐聯、3次聯賽杯、6次社區盾同1次足總杯，佢嚟曼聯的決定睇嚟一啲都無錯。經過咗18年球員生涯之後，大師兄都決定要掛靴喇...

1978年11月7日出世嘅佢喺韋斯咸開始一隊生涯，2000年加盟列斯聯，一度以2000萬英鎊轉會費破哂紀錄。而當年的列斯聯更加係人才濟濟，夏迪、達確特、維杜卡、基維爾、羅比堅尼、阿倫史密夫，一隊人腳齊哂，亦有力戰至英超頭幾名。不過，球會因為債務問題一度連賣主力，而費迪南亦以3000萬英鎊的天價加盟曼聯，開啟了其職業生涯最輝煌的一頁。
終於都行到呢一步喇，里奧就咁講：「經歷18年的職業球員生涯，我認為係正確掛靴嘅時間喇。我仲好熱愛足球，亦為曾經代表國家隊出陣81次感到好自豪，我一世都會記得。」

里奧呢排發生咗都好多事，在QPR不得志、上陣機會唔多已經係小事，老婆Rebecca不敵癌魔離世，對於佢嚟講真係一大打擊...不過佢仲有3個囝囝囡囡，個個都未過10歲，真係好需要爸爸照顧...可能因為咁，里奧亦決定畀多啲時間照顧屋企人啦...

佢嘅掛靴由槌仔幫到曼聯都有在社交網站上致敬，舊隊友都有大讚佢，佢嘅人脈真係幾好架！而佢都係搞笑能手，一直都在球場整鬼隊友之餘，亦有自己的搞笑節目，希望樂天嘅佢可以繼續開心啦！里奧，球場上雖然難啲再見你身姿，不過我哋都知你會繼續為曼聯出現喺唔同場合架！到時再見啦！鐵血！
https://www.youtube.com/watch?v=-jdxfC6Sp1E你睇佢幾受曼聯球迷歡迎！