再見了法卡奧 精選

最後，法卡奧都要走了。29次上陣只攻入4球，就算對於一位普通的前鋒而言都係少咗啲，更何況係大家期予厚望嘅攻擊主力球員…表現唔合格，人品再好都無得留低……

雲帥咁講：「法卡奧好有專業精神，佢係一個好人。我代表我個人同球會的每個人祝佢前程無限。」而佢應該唔係唯一一個走嘅人，同行嘅好可能有迪基亞…至今，英媒仍然認為佢走嘅機會非常大，而雲佩斯同迪馬利亞於球會的前程亦唔太樂觀，前者傳被卡塔爾的球會相中高價挖角；後者因為傷患、狀態問題連楊格都鬥唔過，未必有機會留低…
講返法卡奧，《每日郵報》統計佢上陣要成322分鐘先入到一球，29腳射門只有16次中龍。《鏡報》計算老虎加盟之後獲得1060萬鎊的收入，咁計法佢嗰4個入波含金量真係高到嚇人，每個值成265萬鎊…

不過有時啲嘢真係好難講，好似巴神打利物浦表現認真麻麻，不過當年喺曼城54場入20球，夾唔到紅軍就係夾唔到…同樣都係利物浦，托利斯在紅軍如魚得水，去到車路士就連離門5碼的空門都攻唔入…所以法卡奧對於自己能否立足英超仍然存有希望，外間認為佢願意減薪轉投另一英超名門，杜奧巴離隊的車路士、「無鋒」紅軍亦對佢有興趣，如果真係成事佢下季隨時倒戈紅魔，到時佢打返出神鋒水準的話，筆者諗就算一班曼聯球迷都應該有啲開心，始終佢對曼聯真係好有心！