曼聯專區小評：新陣有效源自立體感 精選

其實落筆時都諗緊，「新陣」呢個詞有啲古古怪怪，因為都試咗成季，依家仲係唔係叫新陣？不過再諗多陣，其實都算算哋，首先433嘅嘗試係近3、4場比賽先至定案，叫做係新啦；而沿用呢一班球員而且行之有效亦係近期嘅事，所以叫新陣都講得過去，咁就姑且咁叫先啦！

呢個新陣其實對雲高爾而言幾難接受，因為幾點都同佢個人喜好唔太一樣，不過無計，有效，當然要用。首先雲高爾喜用雙前鋒，不過現時呢個陣數盡都係打單前鋒。好似呢場比賽朗尼打前，輔以左右的楊格馬達攻堅，中場打費蘭尼同靴里拉，卡域克稍稍墜後。無錯，就係單箭頭喇。而後防方面，雲高爾喜打3中堅，不過佢吃過唔少苦頭之後，終於都轉打4後衛陣容，而效果其實非常好。
好喇，入正題，新陣有效源自有立體感，原因在於曼聯呢個陣在三維空間之中發揮得好好。無論咩情況之下，你都可以睇得出球員形成咗好多大大細細嘅三角型。例如左路方面，白蘭特、楊格組成了三角型的2點，而第3點就不斷轉移，形成穿透對方防線的三角形。小三角的話，第3點可以係靴里拉、可以係費蘭尼，亦可以係朗尼；大三角的話就可以係卡域克、可以係馬達，好多選擇。而呢個情況之下，如果交俾費蘭尼仲可以取得高空的優勢，成為一個縱向的三角形，俾費蘭尼攻門或者二傳形成空間上的三角。同樣地，右路一樣好多三角，馬達同華倫西亞又係組成三角型的2點，而第3點亦係不斷轉移，同樣可以揀靴里拉、費蘭尼、朗尼。
而最恐怖的，係呢幾個三角形係相互互補，朗尼衝殺上前引走對方防守球員，白蘭特、楊格就可以揀佢身後的靴里拉嚟交波；唔同點都有人照應，唔同攻勢都有球員配合，形成一個予取予攜的情況。萬一節奏失控，又可以俾返卡域克於中圈附近重整隊形，令各個三角形可以再次成形。

今日呢個富立體感的陣式就係以三角為中心，早前曼聯的陣式未完整，好多時都係以線為中心，只係以橫線傳球，無咗前方的接應點，組成唔到三角型。而呢個陣同當年費格遜的陣式亦有一定不同之處，雲高爾的三角是以左右後衛開始組成，而爵爺的三角主要在中場中路，中線攻擊球員才組成三角以短傳突破，精於此道的是史高斯同傑斯，二人最愛one touch一觸球即彈前，由朗尼等前鋒做突破。左右方面爵爺喜用的是疊瓦互補，閘位球員與翼鋒球員配合落底線或突進，再選擇斬波還是個人突破，都係近似直線攻勢。
不過家下呢個陣式同當年全民皆兵的曼聯陣式卻異曲同功，前鋒可能只有一個，不過中場中、左右翼鋒個個都係威脅，你見近幾場費蘭尼、靴里拉、馬達人人有波入，就係因為呢個陣組成一個覆蓋範圍頗大的攻擊網絡，可以善用中前場所有球員進攻，攻擊的層面同立體感都增加，對手就難以防守。當然，要形成呢啲小三角就好靠球員的傳送，大家見到曼聯最迎的短傳數、向前傳波數增加，就令呢啲三角形發揮功效了。而呢個立體嘅攻擊陣式可唔可以攻破曼城的防線？我哋拭目以待啦！