又係無名英雄卡域克 精選

無錯，又係想講佢，卡仔。不過佢嘅無名大家都睇唔少，都係嗰啲啦，唔係好突出嗰個呀，控制節奏呀，悶唔悶啲？悶就悶啲，都係要講，不過講呢樣之前，講下第二啲「無名」先！

卡域克另一種無名，在於佢真係好鬼低調，剛剛就有人認到佢同老婆Lisa姐一齊去酒吧，但係人人叫酒佢就去飲可樂；個個去完唔揸得車，佢就無咩所謂因為半滴酒都無落過肚。當地人都好喜歡佢：「佢同老婆都好可愛，好親民，我哋唔會因為佢哋嘅工作而喜歡佢哋，而會因為佢哋嘅性格而喜歡佢哋。」緋聞？當然無可能，Lisa姐同卡仔識於微時、青梅竹馬，仲有一仔一囡，美滿家庭，真係羨慕死人…就連靴里拉都對佢好尊敬：「卡域克好嚴謹，而佢亦符合咗一個講法：『領袖係唔需要講得多，佢要做嘅係講緊嘢嘅時候都要繼續聆聽。』」
不過有呢位大阿哥在陣，曼聯又真係發揮得幾好嘅，佢正選之下曼聯的勝率有7成7，無佢就跌到4成4，絕對係球隊致勝的關鍵人物之一，而呢點就連英格蘭國家隊都注意到，喺「雙特」都退出國家隊之後，佢被重召仲喺對立陶宛一仗上陣，表現都唔錯！雲高爾更稱佢為「第二隊長」，喺平衡球隊的重要人物之一。唔知呢一位謙謙君子，會為曼聯爭戰到幾時呢？筆者就認為大把時間喇，因為佢從來都唔係速度型、又唔係體力型，打傳波打較炮，應該可以打到35嘅！(家下33)