曼聯專區小評：10大約滿將士逐個睇(下篇) 精選 推薦

嚟到下篇，睇嘅都係後半場球員，今年曼聯的後防打成咁，睇嚟個「去」字會不斷出現…

連迪加特
筆者對連迪加特都幾有好感，作為2號門將，佢俾人感覺好穩陣，比起當年的古斯錫，或者係依家嘅賓阿姆士都俾到更大嘅信心球迷。然而話又講返轉頭，雲高爾今季真係半場都無俾佢出過，再加上現在有域陀華迪斯在陣，根本就無連迪加特的立足之地…依家嘅足球趨勢係頂級球隊入面通常會有2位世界級的門將，如今迪基亞同域陀華迪斯已經佔住首席，就算下季迪基亞真係離隊都好，連迪加特亦難以成為域陀華迪斯的替補人選…
你都係一位好龍門，為自己著想，都係快快趣搵間中型班，爭個正選好過啦
ESPN：去
曼聯專區：去
(ps：筆者搵佢著住新一季波衫的相都有啲難度...)
拉菲爾
呢位巴西右閘一直都係曼聯球迷眼中的潛質新星之一，亦一度與華倫西亞打哂曼聯嘅右邊，其風評甚佳，速度、助攻力、回防能力俱佳，只係有時有啲唔成熟，其實係可造之材…不過咁，佢都係雲高爾不信任人物之一，見佢寧用麥尼亞打右閘就知…最大鑊嘅係，依家傳雲高爾仲想要修咸頓的新晉右閘尼達利基尼，即係點都唔想用拉菲爾…呢個情況之下，24歲嘅佢其實仲有好多機會，點解仲要留低坐冷板凳呢？ESPN：去
曼聯專區：去

伊雲斯
青訓出身嘅佢，慢慢打起、慢慢爭到正選，慢慢由不穩變得有信心，慢慢成為曼聯後防的重要一員…只係，佢嘅表現又慢慢咁變差，信心又一直下降，甩漏又慢慢多返…曼聯需要的，係一位穩定的後防重心，以伊雲斯咁嘅不穩狀況，真係好難說服其他人去信任佢…所以…ESPN：去
曼聯專區：去

史摩寧
同鍾斯一樣被視為三獅的未來重要一員，史摩寧的進步似乎同大家期待的有啲落差。佢係一位唔錯嘅後衛，不過唔好話同當年的里奧、維迪無得比之外，其實同鍾斯都有啲距離…(鍾斯都已經唔算非常好…)如果曼聯係中型班，只係爭七八的話，史摩寧絕對係啱用有餘，不過如果係要挑戰歐洲戰區、挑戰英超的頭三位，史摩寧睇嚟未必係我哋需要嘅將士…ESPN：去
曼聯專區：去

迪基亞
最後一位合約需要傾傾佢嘅，就係迪基亞…你話，留定唔留？我諗答案真係人人一樣，除咗佢自己。合約只剩下16個月，偏偏又傳出雲高爾同迪基亞不和，雲帥完全唔肯公開讚佢…只不過，地球上要搵出一位強過迪基亞的龍門真係一啲都唔易，無咗佢，曼聯真係會幾大件事…皇馬已經對佢虎視眈眈，經理人文迪斯又表現出迪基亞「若即若離」的態度，咁如何是好呢？其實之前提過嘅9位球員都有唔續約嘅空間，我哋都有信心可以在市場中搵到球員去代替，惟獨迪基亞真係唔知可以搵邊個…又後生，又已經有好強的能力，猶如買咗個年輕的保方、卡斯拿斯一樣，如果真係續唔到約，比失去上面9位球員的影響更大…
所以，雲帥請努力。