巴利同迪基亞要邊個？99%球迷：梗係要迪迪仔 精選

有關曼聯想簽加里夫巴利，以及皇馬睇實迪基亞嘅傳聞，都唔知已經傳咗有幾耐，而日前曼聯球迷信託基金（Manchester United Supporters' Trust）就同大家晌facebook做咗一項統計，就係你要留住迪基亞，定係要簽入巴利呢？

最終項統計發佈咗24小時後，信託基金發言人公佈咗球迷們投票結果，超過99%嘅球迷都揀留住迪迪仔，而唔係用佢作為收購巴利嘅籌碼。呢位發言人亦借機呼籲曼聯高層要順應球迷訴求，「調查結果是對活禾特及加拉沙家族一個挑戰，佢哋必須要晌皇家馬德里提出羅致迪基亞之前，同呢一位曼聯目前最受歡迎嘅球員續新合約，唔好俾皇馬買到佢。」

其實呢個賽果都可以話係預料之內，話晒曼聯今年後防表現咁唔穩陣，如果唔係有迪基亞晌後場成日作出「神救」，為曼聯由輸變和，甚至贏埋，依家曼聯點會排到第4呀，況且曼聯依家前線點都ok過後防，前面有朗尼、迪馬利亞等人，攻方面算唔係問題，假以時日俾多啲機會贊奴沙打都可解決一下，不過後防就真係.....就算買返個星級中堅，應該都未可以咁快將後防變得穩健，展遠計未來幾年都好需要迪基亞把關...

迪基亞德赫亞目前同曼聯只係剩返18個月約，已經到咗續約談判關鍵時刻，但現時睇落雙方仲未有咩進展，攪到啲傳媒就揣測曼聯係唔係真係如傳聞所言，想用佢去交換由費sir時代開始已經想收購嘅巴利。