法卡奧：已習慣曼聯生活 精選

講到新球員，大家季初當然最期待「老虎」法卡奧的表演啦！不過借到來之後法卡奧好似一直都忘了帶射門鞋，表現都係麻麻…上陣12次攻入3球嘅佢，呢一排可以話終於漸入佳景，對維拉同史篤城都係靠佢入波逼和咋。而呢個慢慢轉好嘅表現，可能同佢越來越適應當地生活有關。

佢咁講：「我好好呀，我屋企人都住得舒服，開始享受曼市的生活、曼聯的生活。個個都對我好好，對我屋企人都好好，所以我哋好開心。於我自己而言，英超真係吸引過法甲，後衛強悍好多，而且好有侵略性。真係好架，比賽好激烈，而且好體力化。所以我好努力架，我知每一個入波都好大嘅努力先得，所以我慶祝入波時非常激情！因為每個入球都背後都有好大意義，每次慶祝我都搏命架！不過最特別都係啲隊友，一開始已經對我好好，好歡迎我。佢哋事無大小都會幫我，真係令人好驚訝。」
不過呢個都應該係雙向嘅，事關好多傳媒都講過，法卡奧在更衣室態度好好，好希望同其他人熟啲，而佢搏命嘅打法、態度又積極，再加上唔獨食，又難怪隊友like你嘅！