費蘭尼：打正選好攰架！ 精選

哇，呢個言論都幾勁爆，話自己打正選好攰，咪即係叫教練唔好出你？咁大家可以放心，費蘭尼嘅意思，係之前凍得太耐，家下奪回正選之位有啲唔慣啫！

佢咁講：「我有一點點疲累，因為我每場比賽都上陣，令我感覺到少許疲憊。不過我要好好休息，然後再繼續努力先得。可以入波對我嘅信心好有幫助，而個傳中亦好靚(靴里拉交嘅波)，呢個係好好嘅『合體技』。」星期二2:1擊敗史篤城的比賽入面，爆炸頭呢個入波係本季第二個入波，而佢連續6場英超上陣，係加盟曼聯之後最長的一次連續上陣，之前都叫做清閒嘅佢突然咁多波踢，有啲攰都無可厚非嘅，係唔係？
而佢亦提到曼聯4連勝：「我哋都希望可以延續勝軌，繼續贏波。我哋對各人都認識更深，對領隊又認識多咗、對職員認識又多咗，更重要嘅係對領隊的足球哲學更理解，為了可以繼續好表現而努力訓練。慢慢地，其他球隊會發現，嚟到奧脫福好難可以擊敗我哋！」唔經唔覺，曼聯7場主場比賽入面已經贏6場，雖然仍然未係好穩陣，不過咁樣改善落去，奧脫福再次成為難攻不下的要塞指日可待！
哎呀！好痛不過有波入，都開心嘅！