「老虎」回歸! 法卡奧對侯城一戰復出 精選

今夏從摩洛哥外借加盟曼聯一年嘅法卡奧，由於轉會後不斷有受傷情況出現，令這名哥倫比亞前鋒目前只為曼聯上陣過5次，並只得一個入球，每次都唔能夠踢足90分鐘。晌對阿仙奴嘅比賽前，原本法卡奧準備復出，之不過佢又晌訓練中拉傷小腿，要將復出一事再押後。

之不過今次受傷就唔係太嚴重，法卡奧本人已經可以參與球隊周日訓練，曼聯方面亦有晌佢哋官方Twitter公佈法卡奧訓練照片，表明佢已經晌小腿傷勢中完全康復，照片中法卡奧更向攝影師豎起手指公，而佢嘅隊友顯然晌聯賽中擊敗阿仙奴而心情愉快。

法卡奧其後亦都晌自己嘅Twitter到表示：「百分百恢復操練，已經為下一場復出做好準備。」曼聯下場對手係侯城，希望到時法卡奧可以為球隊上陣之餘，亦有進帳喇。

另外，領隊雲高爾晌法卡奧頻頻受傷後，曾表示過如果早知呢個情況，可能唔會外借佢返嚟，更暗示如果法卡奧唔能夠重回昔日狀態，曼聯或者會改變季後買斷佢嘅決定。而據《每日郵報》統計，法卡奧已從曼聯手上攞走咗400萬英鎊人工，但如果以佢嘅入球同場上表現嚟睇，暫時曼聯仍未回本。