朗尼：C朗超越咗美斯喇！ 精選

如果要問到邊個係世上最勁嘅足球員，大家唔係答美斯就係C朗，佢兩個邊個係近年最勁，一直都係爭論話題之一，而晌金球獎名單候選人公佈之後，呢一個問題就再次成為熱話，而紅魔及英軍朗尼就力撐C朗，認為後者已經超越美斯成世界上最佳足球員。

朗尼晌接受MUTV訪問時，被問及有無覺得C朗應該贏得今屆金球獎時，朗尼就講喇，「我覺得應該喺C朗攞，呢兩三年佢嘅表現，的確係令人難以置信。我認為佢已經完全超越美斯，成為世上最出色足球員，我覺得金球獎好難頒俾第二個。」

雖然朗尼呢番說話難免有放個人感情入去，畢竟佢同C朗晌曼聯做過隊友，亦有傳媒認為佢為幫助曼聯從皇馬搶番C朗返嚟而咁講，不過佢又唔係無道理，，佢認為C朗今年為皇馬贏得歐聯嘅過程中，起關鍵作用，而且佢晌葡萄牙國家隊亦有一夫當關表現，晌對瑞典嘅附加賽入面，可以話係佢一己之力幫助葡萄牙攞到參加巴西世界盃決賽周嘅資格，加上本季C朗繼續火紅，喺各項戰線上都入球停不了，18場入24球。

之不過其實佢最大敵人美斯表現都唔差，啱啱晌歐聯入球數字上取得第71個入球，追平魯爾紀錄，比C朗多一球，而晌今季上陣14比賽入面，亦都有11球進帳。只係如果就咁睇入球數字，金球獎晌明年1月揭曉嗰陣，以目前情況嚟看，睇怕C朗獲獎機會可能性好大。