紅魔鬼本季4大驚訝 精選 推薦

開波只係7場，一眾紅魔迷已經坐過好多次過山車、撳爛咗好多個平安鐘，到咗今日竟然可以企喺聯賽第4位，真係如夢似幻、以為自己發緊夢。可以行到呢一步，其實當中有好多令人意想不到的事情發生過，ESPN就列出幾點，筆者就整理一下、同大家分享！

第一點ESPN認為最令人驚訝嘅係迪馬利亞以超驚人速度融入球隊，更加已經成為曼聯的X factor，球隊的榮辱似是已經押在他的身上。在阿根廷他是美斯之後第二把交椅的攻擊指揮官，在皇馬都是極為重要的球員。不過任你強橫如此，都無人諗過佢連適應力都咁驚人！無他，就連皮里斯、亨利、柏金等人初到英超都係打得好辛苦，不過「天使」好似無呢個問題，一入隊已經3入波3助攻，睇落身體抗性唔強嘅佢好多人都唔睇好佢打英超，不過結果係佢打英超都有板有眼！當然啦，奧斯爾初到阿仙奴都係「高人一皮」，不過就在極密集的賽事之間消磨了鬥志與銳利度，筆者當然唔希望迪馬利亞同樣命運啦！
另一個驚喜係法卡奧。你可能會話，佢入得一粒咋噃，作為世界級前鋒，幾場得一個入波係唔係唔合格呢？你可以話佢嘅攻門確係無受傷前咁準，銳利度亦真係不足，如果你當佢係入波好似生菜咁嘅法卡奧嚟比較，當然有啲「水貨味道」。不過一方面你要體諒佢剛剛傷癒、又轉咗新球會；而另一方面，今時今日的法卡奧唔再係單單以入波作為武器，佢嘅助攻先係曼聯的意外收獲。佢至今2次助攻雲佩斯都係非常美妙，如果可以同迪馬利亞擦出埋火花，佢隨時成為隊中第二把交椅嘅助攻王！當然，大家最期待都係佢快啲入返波，變返場場有進賬嘅法卡奧啦！

不過有喜都有驚嘅，其中一個就係雲高爾的調兵遣將能力好似有啲不對辦，就以李城一戰為例，換走迪馬利亞可能係逼不得已，不過用贊奴沙換入法卡奧就真係令人有點摸不著頭腦。而佢用贊奴沙打中場中呢個決定亦係非常古怪，根本就得唔到預期的效果。雲帥在荷蘭國家隊的「調動改變戰局」能力好似仍然未發揮到，可能係仲未摸清麾下球員能力的緣故吧…
更令人嚇餐死嘅，係伊雲斯的大跌watt，喺鍾斯傷出、史摩寧又無咩進步的情況下，過去幾年一直進步的伊雲斯已經是曼聯後防的重要希望之一。不過唔好意思，今年佢跌watt的速度真係快過插水，佢嘅狀態低沉喺對MK don的聯賽盃賽事表露無遺。其實佢傳波都算幾好，加上位置感都唔差，以前有鬥心、有信心時防守力絕對唔弱，只係傷完之後一直都驚驚青青，以佢咁乖乖仔嘅形象睇嚟，好明顯就係曼聯過去一季打得太差，佢好大壓力；間接令佢嘅信心同集中力受到好大影響。其實你大個仔架喇，無咗里奧、維迪，後防線上佢已經係大阿哥，如果仲係一副擔唔起大旗嘅樣，咁一月買到新球員之前曼聯球迷睇嚟都要買多啲驚風散旁身…