財金直擊：曼聯上季有賺，但係… 精選

錢錢錢錢錢。咩都係錢，曼聯剛剛用咗天文數字、破哂紀錄買人，都係錢。而今日，即係英國周三時間就會發表上年度的財政狀況，情況卻係令人驚訝：我哋仲有賺！唔通今年可以駛大啲，同賺得多有關？

呢個新報告係紐約證券交易所要曼聯提交嘅，梗係啦，上得市當然要有一定透明度，年年都要向股東交待下財政情況嘅！而出乎意料之外，上季紅魔竟然有好大的收入增長，達4億2000萬鎊！外間估計，曼聯的總收入將會介乎於4億2900萬鎊到4億3400萬鎊左右，計計埋埋啲開資，都賺2300萬到2500萬架！呢筆數已經找埋莫耶斯嘅終止合約費用，而曼聯的季前熱身賽(即係嚟香港、去澳洲嗰個月呢)就總共賺1億1900萬鎊，所以話唔去下「熱身」，邊有錢銀「贖身」先得架！當然，賣波衫其實係好大的收入來源，招股書入面提到，淨係賣衫上年已經賣夠200萬件，連埋其他精品、產品，一季就賣咗成500萬件官方產品！
不過有入當然有出，有兩個數字真係睇到都毛管戙：第一，曼聯今年已經用咗1億5300萬鎊買人，賣200萬件波衫都填唔到呢個洞；更恐怖的，係曼聯的負債仍然有3億5000萬鎊，賺2300萬到2500萬鎊？呢個咪就係現代演繹版的「杯水車薪」囉…
賣波衫賺錢是常識，但連官方united express都串錯字...我接受唔到囉...Falcao呀！