曼聯專區小評：聞到「天使」的燶味 精選

不諱言，筆者真係認為迪馬利亞的轉會對現在的曼聯用處不大。他是頂級的翼鋒，頂級的球員，但他可以為現在的曼聯提供的，只是以個人能力化成的貢獻，而不是由陣式系統帶來的好處。引用政治一點的講法，可以帶來長遠成功的只有系統，個人因素可能只係一刻的光輝，續航力有限。

要談曼聯現在的問題，要由香川真司講起。對新特蘭時，雲帥換人時寧願用贊奴沙打中場唔出香川，佢就咁解釋：「我試過在美國之旅讓香川打中場中的位置，他不能打出我的期望及我的足球哲學。我同佢傾過，香川真係適合打10號位置。在新特蘭的比賽中，馬達打10號位非常出色，所以我只可以換其他位置，於是就換出贊奴沙。每個球隊都有自己的問題，不過真係好少有機會4個中場傷哂。所以要贏，我就要出贊奴沙。現在最大的是創造力的問題，我要的是具創造力的傳送，香川都可以做到，不過佢啱打更前的位置。贊奴沙在比利時國家隊都打過中場，他比較適合。」
好喇，問題就喺呢到。如果352陣式入面唔可以出現兩個10號仔，咁左右翼衛的位置之上亦唔可能多一個翼鋒。迪馬利亞是個天生的翼鋒球員，佢嚟到可以打咩位？翼衛一定唔適合，轉入去打10號又有馬達。佢究竟要打邊個位置？雲帥辛辛苦苦將352陣式帶入曼聯，就係要重新啟動馬達、朗尼同雲佩斯的鐵三角。
問題的核心係，卡華利、費查等人根本創造力不足、亦無法有效連繫後衛同前線的鐵三角，最重要的是無供應俾呢三個攻擊球員。「魔天使」唔係中場中的人選，佢嚟到陣容只會更加混亂。

縱觀英超，大部分列強都是「中場肥美」的：曼城有托尼、費蘭甸奴、費蘭度，次一級都仲有林伯(寫呢句時真係好驚自己打錯XD)；紅軍？謝拉特係必然正選，另外有軒達臣、盧卡斯、啦啦啦同祖阿倫支援；車仔更加不得了，法比仔同可攻可守的馬迪，仲有拉美利斯、米基爾。阿仙奴？韋舒亞、藍斯、阿迪達腳法細膩，而且仲有個殺人王法明尼。
曼聯呢？中場問題其實由堅尼離隊之後只有一直的變差，唔夠人用？史高斯你退完可以再出！都係唔夠？朗尼你打後一格！ok，頂得一陣，到朗尼唔想打中場？好，費查你病都無用，你打！好喇，終於都有一個見得下人嘅靴里拉，又好似唔啱打英超，仲要傷埋。老老實實，我哋要嘅唔係天使，而係魔鬼！一位猶如堅尼一樣的硬漢，筆者認為維達爾、普巴都係人選，次一級可選迪奧堤，再唔係，其實放盧祖去中場都好過用天使！你話筆者希唔希望有迪馬利亞？我只可以講：依家就好似玩啤牌鋤大Dee，手上有9同10、囡同king，你唔去搵隻「積」返嚟，俾隻2仔你都好，你都係贏唔到…天使之翼？有啲燶味囉…
你嚟到，唔通最後都係只能做二等天使？所以咁睇，c朗都唔啱曼聯用...
其實，你諗緊咩呢雲帥？