雲高爾：這是支離破碎的曼聯 精選

如果要用一個字去形容莫帥帶領之後嘅曼聯，你會用咩字？雲帥就用咗一個令人感到唏噓的字：broken，支離破碎。在美國之旅，雲高爾再次接受訪問，今次記者唔問佢買咩人、賣咩人，而係問佢：「如果你係接爵爺手，會唔會更加困難呢？」

雲帥嘅答案係：「唔會。我唔認為係咁，我都係由卜比笠臣手上接過巴塞，佢之前剛剛先衛冕冠軍三次，所以接手勁領隊對我而言唔係問題。(同年雲帥都奪冠)其實取得錦標就代表有好的陣容，不過我依家只可以話曼聯個陣容支離破碎。你可以由陣中見到好好質素的球員，有朗尼、雲佩斯、小豆、韋碧克，不過又有馬達、費蘭尼、靴里拉。太多球員可以勝任同一個位置了。這隊波的平衡有啲問題。我只可以話，承繼一個艱辛的狀況一定辛苦啲。」
其實佢眼中點先叫平衡呢？佢形容好多球員可以打同一個位，馬達、費蘭尼、靴里拉都係攻擊中場的人選，不過曼聯又睇實迪馬利亞呢個攻擊球員，史杜特文又係中場…咁後防呢？呢啲問題，可能雲帥都搵緊答案：「我不會為買人而買人，我只會為咗有更多點將嘅靈活性而買。不過我依家都唔知應該打532陣式定係433，如果用433我就需要更強的翼鋒球員同攻擊球員，買人嘅方針同買嘅球員都會好唔同。」去到呢一刻，英媒就傳緊費蘭尼有機會轉投意甲勁旅拿玻里。雲帥仲要幾多時間同工夫先可以調整好呢一隊曼聯呢？睇嚟仲要一段時間…
小豆你會唔會走呢？你又會何去何從呢？