曼聯專區小評：超級巨星？唔啱曼聯囉！ 精選

歐洲足球已經變成華麗洗錢騷，先有巴塞用天價7500萬鎊要咗阿蘇；再有皇馬以高價6300萬鎊買入007占士洛迪古斯。計埋當年皇馬8000萬鎊買c朗、8600萬鎊買巴利；單單三人已經價值2.26億鎊，比起阿積士114年來的轉會費總開支1.83億鎊仲多！不過當大家都對高價買人嗤之以鼻之時，艾活華竟然同大家講：「要高價買巨星？我ok噃！」

被問到會唔會買返個「8000萬先生」嚟坐鎮一下，艾活華就話：「如果你問會唔會在轉會市場再大洗一筆，這是我們能力範圍內的事，球會亦唔怕咁樣做。呢個唔係關乎破唔破紀錄嘅事，如果領隊想要一個最強級數的精英球員，我哋會出手。經濟上我哋好強大，可以大手買人。」當年費托的轉會費高達5000萬鎊，不過已經係英超最強。曼聯最近的大牌收購有馬達、貝碧托夫、費蘭尼等，都係大約3000萬鎊左右，如果真係要買個再勁啲嘅，其實3000萬鎊以上已經破紀錄。不過邊個值呢個價？維達爾？曉姆斯？史杜特文？迪馬利亞？白蘭特？好似都未到c朗、巴利等人嘅級數…更重要嘅係，曼聯一向都打整體，一人足球對我哋嚟講真係無咩吸引力。當大家都睇住美斯、c朗獨腳戲的時候，曼聯迷其實等緊費查助攻小豆、卡域克長傳朗尼。所以，一個大牌球星對曼聯而言，吸引力真係無咩。
睇返雲高爾帶領的荷蘭，雖然都有唔少星好似洛賓、雲佩斯咁，不過與其話佢看重球星，倒不如話佢睇重化學作用多啲。荷蘭隊入面其實有好多球員都係打國內的聯賽多，阿積士、飛燕諾、燕豪芬咁，都係國外聯賽唔太睇得起嘅球隊，不過雲帥都搵到一班打得出水準嘅，好似迪維積、白蘭特咁，可見球員的化學作用重要過身價。當然啦，用得其所的話，要買嘅總係要買嘅。如果真係啱用，曉姆斯又好、迪維積又好，大家都希望睇到紅魔打出整體、打出氣魄，就好似上屆馬體會咁，成隊平過皇馬8倍都贏到西甲，咁先過癮嘛！
7500萬鎊先生。6300萬鎊先生。
8000萬鎊先生。8600萬鎊先生。
無價。