ESPN：曼聯唔會阻艾夫拿離隊 精選

睇到呢單新聞，筆者真係倒抽一口涼氣…雖然有梳爾加盟，但畢特拿又賣咗，艾夫拿亦續咗約，大家都認為梳爾為主、艾夫拿為輔的情況於下年會出現，不過竟然因為一句「我唔會阻你」而大大改變，曼聯決定唔阻艾夫拿去祖記，唔通真係咁涼薄、刻毒？當我知道原來呢件事仲關係到艾夫拿嘅家人，「虎毒不食兒」，那麼一個球會呢？一個領隊呢？又會唔會為家人俾球員走？

拿，故事就追溯到5月，當時艾夫拿就已經同咗曼聯續約，大家都認為佢唔走架喇！不過問題原來出在家人身上，艾夫拿的屋企人於曼市原來過得唔係幾開心，都幾想離開，究竟發生咩事就無人知喇。為咗屋企人，艾夫拿想走都無可厚非，了解咗件事嘅紅魔鬼亦都決定唔會再阻止佢，只要艾夫拿出到聲話想走，就會放人。大家唔好諗件事諗得太複雜，始終佢真係想走就無必要簽約，今年5月時佢大可以等多幾個月就回復自由身，無必要又要簽、又要走。
2006年以來，艾夫拿為曼聯上陣379次、攻入10球，真係無功都有勞架！不過今次真係因為屋企人而走，意味住曼聯無咗里奧、維迪之後又走一位後防老臣子，而繼畢特拿、法比奧之後，曼聯最後竟然得返一位個左後衛…唔通雲帥又多一個問題要解決？雖然曼聯u21都有左後衛，好似羅利(LOUIS ROWLEY)就係其中之一，不過夠唔夠用就真係無人知…
講到佢，當然要數佢同阿蘇的恩恩怨怨，不過佢哋應該會少見一陣...如果阿蘇真係去巴塞的話。
而你，就真係不愁無上陣機會...反而你有咩傷停，曼聯迷就真係愁喇...