ESPN：上季靴里拉不成魔之謎 精選

據報近日甚囂塵上的靴里拉成魔新聞已近尾聲，因為昨天已有消息指佢已經去到卡靈頓訓練場，宣佈佢成為曼聯球員只係時間問題！可能大家對佢嘅認識都唔深，未必聽過佢係咩人，不過其實曼聯球探已經追蹤佢數年之久，情況就好似當年星仔一樣。不過曼聯真正下決心，係上年發生嘅事情…

靴里拉因為爸爸呢位足球員嘅關係，細細個就喺薩拉戈薩長大嘅，不過佢其實係西班牙巴士克人。而畢爾包其實就係坐落喺巴士克到。ESPN嘅足球記者亨特(Graham Hunter)同靴里拉有一個common friend，佢哋一齊喺薩拉戈薩做嘢時識嘅，對靴里拉嘅情況有第一手消息。佢上年8月尾時就打過電話俾亨特咁講：「安達(靴里拉)同畢爾包都好明白曼聯想要呢位球員，好想在轉會市場關閉之前完成交易。不過靴里拉其實打得幾開心，因為佢搞咗好耐先返到屋企。不過歐霸時對陣曼聯令佢好享受，好明白曼聯幾有力量、幾有野心，令佢好有興趣加盟。只要紅魔鬼係認真嘅，佢就會點頭。」
呢一段說話亨特解讀為，靴里拉好希望快快脆完成轉會的決定，唔希望轉會最後一日先搞一大輪。咁樣會令佢喺球會面對好大壓力，對隊友又好、對球迷都好，都唔係一件好事。於是亨特就快快脆message咗莫耶斯同佢講，當時係凌晨一點，莫帥只係5分鐘之後就回電亨特(你睇莫帥幾勤力T^T)不過在於莫帥的角度，要咁貴買一位年青球員其實係一場賭博，於是佢就猶豫咗幾日、拖咗幾日。不過唔知係唔係因為曼聯要買的人都觸礁，所以在轉會期最後一日莫帥得到會方的指示要「全力收購」靴里拉。

不過呢個情況就係靴里拉最唔想見到嘅。畢爾包對最後一日嘅「瘋狂轉會消息」好不滿，而在畢爾包大門行來行去、無經正式授權的律師亦激嬲咗會方。而查維馬天尼斯轉投拜仁亦引起好大的球迷不滿，洛蘭迪去咗祖記亦有餘波。於是，無論靴里拉自己、畢爾包自己都好，都唔想交易成功…住。就係咁，上年差一步就完成嘅轉會就泡咗湯。
而留喺畢爾包對靴里拉而言唔係壞事。主帥華維迪為佢帶來長足的成長，球隊變得侵略性強、打得聰明咗、而且傷患問題亦變少了。而打4231陣式的畢爾包，亦提供咗一個創造中場的位置俾靴里拉，好似已經於畢爾包企穩陣腳。咁嘅情況下，佢又會唔會真係想過檔曼聯呢？呢幾日嘅傳聞，又會唔會只係「傳曼聯」的虛假消息呢？

文章來源：ESPN
靴里拉下季何去何從？佢都同傑斯同過場架！