高柏尼、維頓漢：費蘭尼好勁架！ 精選

以2700萬鎊，隨莫帥加盟曼聯的費蘭尼在曼聯過得好慘，打唔出水準，仲俾好多香港球迷戲稱佢為「廢蘭尼」…不過佢為比利時後備上陣，一個龍舟撐褪後就幫球隊扳平，再造就一場勝仗。而隊中另一位球員，效力熱刺的維頓漢就質疑，根本曼聯就唔識用佢！

佢咁講：「在比利時，領隊都識得用佢。我唔知曼聯係點，我就係知道費蘭尼對比利時好重要。我知佢面對英國的球迷時有好大壓力，不過佢總係會做好自己，攻入入球。上場比賽真係好開心，完場之後我輕輕擁抱佢一下，因為我知呢個入波對佢而言好有意義。佢係一個好cool的人，壓力對佢而言唔係主要問題。」而曼城的隊長高柏尼亦異口同聲讚佢：「費蘭尼係一位好恐怖的球員。對於第一季去到曼聯嘅佢，一定會有困難的時候，但你唔可以因為一兩季就認定一位球員的能力。對我哋嚟講，佢為比利時出心出力、一次又一次證明自己。」
對於費蘭尼而言，雲帥來投其實未知是禍是福，因為其實連莫帥都好少用呢位子弟兵。另一邊廂，艾夫拿就好期待雲帥就任：「雲高爾是一位好好的領隊，荷蘭表現得好好。根據雲佩斯的講法，雲帥自己好有紀律，亦非常愛好紀律，所以佢一定係曼聯的好領隊。」

費蘭尼筆者都幾有期望架，佢轉打前鋒都幾好睇！不過更令筆者有期望嘅係比利時，雖然佢哋世盃首戰麻麻哋，不過身為「英超雜牌軍」嘅佢哋都真係有好多好球員，好似高柏尼、維頓漢、夏薩特、盧卡古、迪比利等等，全都係英超爭戰，如果佢哋可以再打好啲、順利晉級，大家都會睇得開心！