雲帥唔要法比仔真相 精選

曼聯苦追法比仔一年之後，巴塞終於都開綠燈，不過結果佢去咗車仔幫狂人替林伯。好多曼迷都話，唔明點解雲帥唔追埋一份？英國《星報》就同大家講，內情係因為：馬達！佢哋話，雲高爾認為馬達的作用比起法比加斯有過之而無不及，而且隊中無需要有兩個作用、打法都相似嘅球員，所以拒絕向法比仔出價。

當然啦，唔要法比仔嘅仲有前東家阿仙奴，而情況都係相似，因為雲加認為有奧斯爾就無需要回購法比加斯。而咁多隊英超入面，其實仲有一隊認為有需要買佢，就係曼城！無計，因為「生日門事件」之後耶耶托尼好似已生離心，所以有傳佢哋諗過出價，不過比起法比仔，佢哋好似更想要羅馬後衛貝拿迪亞（Mehdi Benatia）。
喺呢度筆者就唔提阿仙奴粉絲對法比仔「背叛」兵工廠嘅反應喇，香港已經太多負面嘢，無謂要大家再接收多啲負面文字。反而係巴塞名將朗奴迪保亞（Ronald de Boer）就認為法比仔可以在車仔再次發光發熱：「你睇佢踢阿仙奴時，就知道佢喺場上好開心。喺巴塞佢搵唔返自己嘅位置，而呢啲事好正常，勝利十一人之中，唔係個個都感受到球隊嘅魔法，有啲總係融入唔到。佢返到英超就會搵得返佢開心嘅元素架喇，而英超都會好開心有佢返嚟比賽。」而筆者呢，就仲等緊華美倫成魔的最新新聞，唔知佢係唔係真係投入雲高爾麾下呢？