朗尼一次過否定哂c朗、史高斯 精選

世界盃前夕朗尼嘅目中無人好似越來越嚴重，佢接受訪問時竟然一次過將兩位舊隊友c朗同史高斯當成「沙包」，質疑佢哋嘅心態。究竟佢係想對雲高爾落下馬威？定係真係一早唔妥兩位隊友？

史高斯早前話佢可能高峰已過，再唔轉打中場就只有死路一條。轉打中場，佢就有機會打到三十五。筆者自己其實好認同史高斯的說話，不過朗尼就唔係咁睇：「我好肯定史高斯嘅說話令曼聯內部好多人都唔開心。紅魔團隊好多都認為我值得一份新約，所以佢哋同史高斯嘅睇法好唔同。其實佢咁講真係好奇怪，但佢有佢諗法、佢講佢負責。我呢，就唔認同佢架喇。雖然佢係我見過最好的球員之一，不過我唔同意佢就係唔同意。佢係曼聯的好球員，不過我從來都無佢手機號碼，佢都無問過我攞。」哇，呢個時候同大家講佢同史高斯「至老死不相往來」，電話都唔講一個，筆者睇唔出呢啲說話對大家有咩好處…
跟住佢就輕輕咁寸咗c朗一下，暗示佢獨食兼自私：「我唔似某啲球員咁為個人獎項而奮鬥，唔係好似c朗咁。佢做到，你當然要讚下佢。不過我自己呢就係為一隊人勝利而爭戰嘅。C朗唔係，佢想要嘅係屬於自己嘅榮譽，不過我就會為成隊波攞到錦標而努力。我曾經贏到英格蘭足球先生，不過都無曼聯奪冠咁重要。對於世界盃，我總係俾自己好多壓力，可能太多喇，傳媒又俾咗壓力我，所以我已經疲於應對。今年我唔會喇，上次世盃我一啲都唔唔享受，今年我會搵啲正面嘢令自己開心啲。」

其實朗尼嘅形象呢幾年已經失分唔少，為錢又好、為領隊又好，佢都表現唔出有幾大方、有幾無私，依家大刺刺咁講自己「為球隊出力而唔係為個人」，筆者真係一聽就毛管戙…真係為球隊，就唔會爭打前鋒；真係為球隊，就唔會當面質疑史高斯同佢嘅關係…佢對曼聯的功過，睇嚟都唔係一時三刻可以計得到，算得盡…唉，順眼好多。