曼聯專區小評：雲帥「雙刃劍」兩面睇 精選

雲高爾上任、傑斯掛靴並任副手；加上維迪、艾夫拿、里奧等人的離隊幾成定局，新曼聯的重建即將開始。而呢個改革的掌舵手正正就係人稱「雲希魔」的鐵腕領隊雲高爾。強權、自負的人總係一把雙刃劍，佢有能力重創對手，同時亦不免傷到自己。究竟佢嘅加盟是好是壞？
哇...曼聯呀...
雲帥的「敗筆」
先小人後君子，一齊由衰開始睇。雲高爾令人印象最深的，要數佢同球星李華度的恩恩怨怨，同埋佢同巴塞、拜仁的不歡而散。你可以話佢有一定嘅大賽經驗，不過佢嘅自負亦得罪過唔少人，尤其係同球會的管理層成日有衝突，更不要提更衣室的內部問題。佢自己都自我評價為自負、強橫，絕不會被球員凌駕其上。所以，佢一上任第一個問題一定是(仍然是)朗尼。佢係曼聯最高薪的球員(亦係莫帥留下的手尾)，但佢嘅位置其實絕不清晰，9號位有更好的雲佩斯；10號位有更好的馬達；而香川亦表明暫時不會有離隊的想法。呢個局應該點拆？佢好可能以極為破壞性的手法去「解決」事件…
另一方面，雖然雲帥都打進攻足球，亦以戰術見稱，不過他為人古板，靈活度唔高，在拜仁時總係唔喜歡轉陣，就算自己用開嘅4231陣式唔再有效佢都堅拒改動。未有過英超經驗嘅佢，如果佢面對戰術失效會點？

雲帥的「優勢」
不過雲帥有啲優點，係莫帥可見嘅日子內都追唔上嘅。兩位主帥的style真係好唔同，莫帥溫文、熟悉英超但無爭標經驗；雲帥就完全相反，傲慢、對英超陌生但爭標經驗極豐富。然而傲慢可以壓倒唔乖嘅球員；陌生的戰術可帶來新衝擊；而驗極豐富就不在話下，呢啲都令佢有一定程度的優勢，可帶來一定的「蜜月期」。

而筆者認為雲帥與年青球員的工作模式才是曼聯最大的資產，小白、梅拿的掘起其實與雲帥有莫大的關係，喜用年輕將士的雲帥與曼聯著重青訓的理念如出一轍。大家見到威爾遜等小魔將都在蠢蠢欲動，有了雲帥的推動，新的曼聯「小福」再出現絕不是奇事，亦對曼聯的長遠發展有很大的幫助。

你可能會認為青訓遠水難救近火，曼聯下季甩皮甩骨好需要新將，其實呢個雲帥都一定幫到手。無歐聯、無歐霸，其實要吸引歐洲賽區的名將係非常困難，不過依家有雲帥在陣，佢嘅吸引力可以令唔少球員慕名來投。你話莫帥帶隊同雲帥帶隊，邊個有大啲機會可以叫得郁卻奧斯、曉娒士？
所以，雲帥來投之後是禍是福暫時仍是未知之數，惟一比較確定嘅係，佢一定識用雲佩斯多過莫帥…另一個比較確定嘅係，佢嘅金句唔會比摩帥同爵爺少，佢之前寸過一個記者：「究竟係你太蠢定我太聰明？」大家可以坐定定等聽金句都得喇！