維迪：佢走咗，好多魔將都舒服咗… 精選

一直是曼聯最強的後衛組合，維迪同里奧都會離隊。而決定去國際米蘭的維迪，就在臨別之時講述了過去一年曼聯內部發生咗咩事，而矛頭雖然唔可能話直指莫帥，不過佢就認為「佢走咗，好多曼聯球員感覺都舒服咗」，為莫帥的「管治方針」寫上了評價…

佢咁講：「無錯，係有過渡期。有一個對足球完全唔同睇法嘅人嚟咗帶隊，而且佢想將佢用開嘅一套帶入曼聯，一定會有過渡期。我唔係話莫帥一套唔好，只係有啲球員認為以前嗰套比賽方式打得舒服啲。你要知道身在其位，有咩應該講，所以對於怪責一個想做大事而不成功的人係毫無意義嘅。我只能夠講，莫帥好努力、好搏命，而且好專業。佢對自己嘅工作有百二分嘅承擔，只係好不幸成功唔到。」
另一方面，對於莫帥的「管治問題」，其實亦掀起了內部的爭拗：「有時你表現得唔好，你會對自己有懷疑。不過我哋絕對無怪責莫帥，我哋對自己嘅責怪多啲。就連隊友自己都有爭論過。隊友們其實好好朋友，不過爭論係免不了的，因為咁先會進步。我哋雖然咩都可以同大家講，因為已經好耐朋友，不過過程都係會有傷害性。你唔拗，事情唔會好轉。所以，今年在更衣室大家都唔好受。」

由此可見，其實今年的曼聯更衣室中有好大的問題，隊友們都有微言，不過歸根究底，問題係有部分球員對莫帥的帶領方式唔太認同，亦令佢哋打得唔舒服。要知道，一個人要發揮得最好，一定係要自己舒服先。你要雲佩斯下下用頭鎚、要香川左路一直落底線，都同佢哋原本舒服嘅打法背道而馳，咁樣要打出水準，出嘅力隨時係幾倍。今次維迪雖然好溫文咁講話，不過佢所講的正正係今季曼聯沉淪的主因。