「五小福」成班主 唔買曼聯買座「城」！ 精選

早前有報導，曼聯「92年黃金一代」正在籌備「買起」曼聯，筆者睇完之後認為都係不可盡信，無同大家報導，點知原來佢哋真係打算買一隊波返嚟！不過當然唔係曼聯，而係非聯賽球隊沙爾福特城(Salford City FC)。

打算過下班主癮嘅其實無碧咸份(因為佢喺邁阿密搞緊另一隊嘛)，得加利仔、菲臘仔、傑斯、史高斯同畢特啫。不過件事其實幾個月前已經進行緊，到今日已經去到最後階段，只要英格蘭足總一點頭，「五小福」即成班主！
不過，原來呢隊波對幾位「92年黃金一代」都好重要，加利仔就咁講：「我11歲時去曼聯試腳，正正就係喺沙爾福特城進行。我永遠都唔會忘記呢件事對我影響有幾大。沙爾福特城呢隊波代表我年青時嘅一切：對足球嘅承諾、渴求、熱情、精神，我對呢個合作感到非常興奮。」

傑斯嘅弟弟韋賀治傑斯(Rhodri Giggs)更加係沙爾福特城前球員兼前領隊，雖然2012年已經離隊。傑斯亦好期待呢個交易：「人人都知沙爾福特城對我有幾重要，所以呢個係一個好令人振奮嘅收購。我哋大家都衷心期待，係我哋幾個真心想要嘅。我哋都想從事更多足球嘅事業，用我哋嘅足球知識同經驗去振奮年青人的心，去培訓下一代的球員。可以在沙爾福特城做到呢件事更令人振奮。」

史高斯都咁講：「我知呢件事一啲都唔易，不過我哋會由頭開始做，而且有好多好好嘅計劃即將實行。」
韋賀治傑斯
沙爾福特城依家喺英格蘭第8級別聯賽作賽，主場好近奧脫福，只有5英里遠咋。而曼市晚報亦指史高斯有機會成為領隊，不過因為球隊仲喺非聯賽的級別入面，如果可以進入聯賽級別，史高斯先會考慮做呢隊波嘅教頭。