曼聯專區小評：歐聯奇蹟晉級所見的三件事 精選

球隊近況麻麻、敗予利物浦三球、高層傳出要炒莫耶斯、媒體傳出傑斯莫帥不和、等等等等不利消息，加上首回合先輸兩球，今仗曼聯要反勝晉級可謂非常困難，筆者亦在昨天發表過文章指曼聯的機會微乎其微。然而，紅魔再一次估你唔到，真係剛剛好唔多唔少，3球踢走奧林比亞高斯。究竟呢場勝仗、呢個絕地晉級，與莫帥的統率有無關係呢？筆者認為，真係無咩關係…

首先，看曼聯今仗的氣魄，很難想像是莫耶斯的激勵中出現的。就連ESPN的評論，都認為球員用命很大的原因在於大敗予紅軍之後的恥辱感。其實細看比賽，曼聯只有10腳攻勢，比客隊還少3腳；後防的打法仍然雜亂無章，對手有極大的空間可以進攻，一切一切都顯示球隊的核心問題完全沒有解決過：戰術訓練不足，對防守的意識亦不強，如果不是迪基亞再一次有超水準表現，曼聯今仗要保清白之身實在有難度。不過，因為恥辱感令一眾球員跑動多咗、盡力去比賽，就係呢一團戰意先令曼聯可以晉級。面對八強可能的對手：皇馬、巴塞、拜仁、多蒙特、聖日耳門、車路士等等，單靠戰意實在太單薄了。

另一方面，今仗的靈魂人物，連中三元的雲佩斯可以爆發，亦是反勝的主因。莫耶斯接手以來，他的戰術對雲師兄而言都是惡夢：大腳無目的亂斬高波，對不擅長高空攻勢的雲佩斯而言一啲好處都無，亦令佢一直都未能成為比賽的關鍵人物。今仗情況有啲唔同，因為交波嘅係以交到腳為目標嘅傑斯及朗尼。傳送的質素明顯就是今仗的分野。傑斯的傳送一開始就給予朗尼一個幾近入波的頭鎚中柱機會；而雲佩斯的十二碼亦是傑斯的傳送造就的。而朗尼今仗亦打後一格，以連繫中前場為己任。如此一來，2R數月來的貌合神離一掃而空，二人的合作無間令雲佩斯終於返嚟。雖然佢比賽尾段傷出，不過根據莫耶斯賽後的訪問指佢嘅傷應該唔太嚴重，各位唔駛太擔心。
而最後的一個重點，亦係一個重要的問號：點解傑斯由一月到昨日為止都只得10分鐘的上陣時間？今仗的傑斯原本久疏戰陣，偏偏就成為球隊的成功關鍵。當然大家都唔可能再要求佢打足全場，不過聯賽當球隊落後時，莫帥唔用香川真司係慣例，咁傑斯呢？佢嘅傳送係卡華利同費蘭尼再練十年都仍然望塵莫及嘅，有佢後備上陣仲有機會可以扳平。點解上仗仲要用卡華利換走費蘭尼？
結論係呢場波贏到，已經俾咗提示莫帥：唔可以再左右出波，要前場球員自由發揮先可以俾到雲佩斯返生；朗尼唔可以再自私打前，要打自由人用其足球智慧幫球隊；最後，就係一定要買一個識交波嘅中場，或者叫朗尼、馬達轉打中場。依家都仲叫有傑斯，除非你要佢打到2036啦。