ESPN消息：高層已開始考慮炒莫耶斯 精選

根據ESPN報導，曼聯內部消息人士同佢哋講，紅魔董事會的話事人已經開始對莫耶斯投下反對票，而自上任起，莫帥終於首次面對被炒的危機。

而除咗曼聯董事會，就連格拉沙家族對炒莫帥一事都持開放態度，雖然呢一刻仍然支持莫帥，不過嚟緊呢一星期將會係關鍵。主因大家都知，只要周中歐聯一出局，莫帥的烏紗就唔可能戴得穩陣喇…如果連歐聯都過唔到，對韋斯咸、曼城的比賽，隨時無莫耶斯份。
莫：你...仲支持我架呵？ 傑：呢層呢...
格拉沙家族對曼聯的近況「非常緊張」，尤其係輸俾紅軍之後。而當中最重要的原因，當然係：錢。據稱，有唔少今季簽落的「米飯班主」已經感覺唔對路，認為自己已經搭緊沉船，尤其係呢一刻，曼聯呢個品牌已經同「失敗」掛勾，唔單止影響佢哋繼續贊助的意欲，亦令好多潛在的贊助商卻步。

而慢慢摧毀一個世界級品牌亦令曼聯的管理層越來越不安。而消息更指，原來曼聯管理層一直都打定輸數，認為下季一定無得打歐聯先咁支持莫耶斯。不過無得打還無得打，曼聯的插水式下滑已經觸及危險區域，隨時造成不可挽回的影響。所以為了保障財政收入，莫耶斯的下台已經不是不可能。甚至，已經有唔少曼聯的管理層已經倒轉槍頭反莫耶斯，而爵爺、卜比sir雖然未至於倒轉槍頭，不過都已經唔係無條件撐佢。
而ESPN收到的消息，荷蘭國家隊靈魂人物雲高爾有興趣接莫耶斯棒成為新魔頭，而佢已經無之前咁想去熱刺教波了。早前熱刺仍然非常有信心世盃之後可以請得雲高爾領軍，而今日的消息出現之後，佢哋已經唔再咁樂觀了。

筆者就認為傳雲高爾接棒呢招真係高，起碼可以穩定同為荷蘭人的雲佩斯的離心，另一方面佢一定比莫帥更識用雲師兄。問題係，聽完呢單新聞，你會想周中歐聯輸定贏？筆者自己就已經...有答案...
rvp：快啲嚟啦！