曼聯準備同聽明仔續約? 精選

據英國《星期日郵報》披露，曼聯已經著手準備同「聰明仔」卡華利續約，佢同曼聯現時嘅合約去到2015年夏天就到期，而該報表示雙方續約談判已經進行當中，談判一切順利，距離續約成功只差少少，只要成功，卡華利周薪將上升至6萬鎊，此舉可見呢名中場球員將會係莫耶斯喺曼聯計劃中嘅一部份。

卡華利12歲就加盟曼聯青訓，費SIR領軍時都俾到唔少機會佢，去季就已經有22次上陣機會，入咗2球同交出2次助攻，不過佢今年表現的確有跌watt，先係多場波賽後都俾人重點批評佢只係識得將波橫傳同交後，對球隊進攻無咩幫忙，而喺數據上，聯賽上陣19次入一球，無助攻，狀態的確有下滑，更令佢近期成為被批評對象，入選英格蘭對丹麥大軍嘅佢，被17000名球迷晌互聯網上聯名，叫鶴臣唔好帶佢參加今年巴西世界盃，而周中英格蘭與丹麥一戰中，賽前當大會讀出「聰明仔」個名時，溫布萊看台亦傳出一片噓聲。

其實鶴臣賽前都有幫「聰明仔」，強調自己唔會為民意左右自己決定，就連莫耶斯周五賽前記者會都公開支持佢，雖然卡華利今年表現的確唔受到球迷支持，但其實佢喺場上走動都多同勤力，而且又真係唔應該將曼聯表現唔好嘅責任放晒落去佢身上，所以對於佢呢個景境，都感覺佢有啲慘情。