曼聯專區小評：奧林比亞高斯給曼聯的三大警示 精選

莫耶斯沉醉在2005年，利物浦奪得歐聯冠軍嘅美夢，睇嚟係時候被奧林比亞高斯兩腳踢醒。莫耶斯之前講過：「進入歐聯決賽的球隊並不總是最強隊伍，2005年利物浦給予曼聯希望，任何盃賽中，你都會有機會奪冠。」不過睇完昨晚嘅比賽，無論邊個都知呢一隊曼聯已經唔值得贏到任何的榮譽。

唔好講得遠，單單睇排陣就知道莫帥的領軍能力已經見底。由楊格、華倫西亞、卡域克與卡華利組成的中場線，根本就係任人凌辱的配搭。卡華利的狀態、打法已經同兩年前不可相提並論，級數上已經難當大任，明明有個費蘭尼在對水晶宮時復出兼打得唔錯，不過莫帥仍然選擇了卡華利。而楊格、華倫西亞的能力亦已經見底，見到佢兩個就知好易就防守得到。華倫西亞成場波都唔選擇將波交到朗尼、雲佩斯的腳下，反而選擇大腳斬中浪費機會、白白放棄控球權。楊格今場波打得好咗，原因係佢移入咗啲，其作用甚至比唔知自己做緊咩嘅朗尼更大。
好喇，當隊波全面崩潰，就將雪到硬哂嘅香川真司放出來，得30分鐘踢嘅佢仲可以改變啲咩？
第二，曼聯的防線其實亦係全線崩潰。今仗上陣的四大守將，其實下季好可能三個都已離隊。維迪已經著緊半件國米的波衫、里奧就算唔退休，你見到佢可能仲驚過喺某主題公園見到羅蘭姐、而艾夫拿，亦與曼聯若即若離。淨返一個史摩寧，佢打右路只可以用四個字形容：動魄驚心…
理論上，卡域克已經再打後一格以防中的身份助陣，里奧再慢、史摩寧再失位都有人可以補到，不過最大問題唔係失位而係失魂，將防線收到最後、偏偏人人都遊魂，最後當然係要球隊付出代價。
不過最重要的問題，當然係莫帥的諗法。佢雖然無講出口，不過佢一定係認為第一腳入波係對方好彩、第二腳入波係世界波無得救。不過，唔知佢又睇唔睇得到，第一球如果唔係成班後衛發緊夢，求其有一個人大腳清，呢球就唔會入得咁肉酸？又睇唔睇得到，第二球如果有人拍埋去甘保身邊，佢邊有咁多空位、咁舒服就起到腳？佢又聽唔聽到，賽後雲佩斯話有隊友阻住佢嘅走位？究竟平日嘅訓練莫耶斯做緊啲咩？究竟一班紅魔喺佢哋帶領之下點解會變哂無腦球員？呢個一定係球員嘅態度問題而唔係能力問題，一日莫帥無法駕馭一班球員的諗法，成績只會繼續不穩落去。雖然未至於去到降班咁嚴重，不過沉淪七八九位、歐戰無期只會係家常便飯。