安達臣：好多人都想離開曼聯!!! 精選

睇嚟莫耶斯上任後，唔止球隊晌場上表現失色之外，就連隊內軍心都成問題! 莫耶斯早前曾經晌記者會到表示，佢將會晌今夏對陣容進行大換血，但日前被外借至費倫天拿嘅安達臣日前就表示，好多名紅魔兵都想離隊，咁就真係唔知喺莫耶斯認為呢班費sir前朝功臣實力唔ok，定係佢因為穩定唔到軍心，令到好多紅魔兵都唔想為佢效力喇…

一月轉會窗曼聯出走多名球星，法比奧被賣至卡迪夫城，兩名前途新星東尼菲夫同蘭特高爾轉投富咸，韋費特沙夏亦都唔受重用下都轉戰該支威爾斯球會，安達臣被外借至意甲…而安達臣日前出席費倫天拿記者會更表示，佢好希望晌季尾後留隊，唔想重回曼聯，「我好肯定有好多球員都希望離開曼聯，尤其係自己同蘭尼呢一班已經效力紅魔7至8年嘅球員! 曼聯的確係一間大球會，每一個足球會都想效力嘅地方，不過亦有人想離隊，體驗另一種踢波經歷，以及學習新事物。」

先講安達臣，佢07年加盟曼聯。6年半時間內，安達臣都未能穩佔紅魔正選一席，不時被傷患困擾，去到今季亦只曾晌聯賽上陣兩次，相信就算費倫天拿季尾唔要佢，佢都應該下季唔會效力曼聯。至於被安達臣點名嘅蘭尼，今夏先同球會續約五年，不過如果安達臣講嘅嘢係真，咁睇嚟今夏續約一事都只係想將蘭尼賣個好價錢，而事實上佢今季不時受傷，上陣時間不多，而表現亦不是太突出，莫耶斯想在今夏賣佢走也不為奇。

另外後防線幾位球員亦有機會離隊，先有里奧費迪南，今季約滿嘅佢，今季已經鮮有上陣機會，睇嚟季尾續約機會唔大，另外佢嘅中堅拍擋維迪，早前佢經理人表示過維迪唔會續約，將會離隊，仲有艾夫拿續約一事亦未傾得成。

加埋一月份已受到多間球會垂青、其經理人表明今夏會好好想想前景嘅「小豆」、一直盛傳同莫耶斯不和，更傳至季尾想重投阿仙奴嘅雲佩斯，以及稍後先決定續約一事嘅朗尼，睇嚟曼聯今夏難以避免唔進行大換血。
莫耶斯上任後都幾多問題...