悲情的金童獎得主：安達臣 精選

等咗好耐好耐，大家終於都見到安達臣有機會離開曼聯…曾幾何時，大家都對佢有住好大的期望，點知一次又一次的失望，最後佢嘅離開可能令好多曼聯迷都有種如釋重負的感覺…不過大家唔好忘記，佢曾經係歐洲球壇入面一位備受關注的超新星。之所以一直沉淪，係運仔唔好，亦好大機會因為球隊的方針…

歐洲金童獎(Golden Boy)，係每季歐洲區表現最突出的歐洲年輕球員先可以得到嘅，而且唔係好似某啲頒獎禮咁太公分豬肉，人人有份，金童獎得獎者每年只得一個。歷屆的得主，最後都成為獨當一面的球員，2003年來，歷年的得主有雲達華治、朗尼、美斯、法比仔、阿古路、柏度、巴神、馬里奧葛斯、伊斯高，同上年的普巴。無錯，人數上少咗一個，因為呢一位就係2008年得主安達臣。

呢一班人成長好快，都喺球壇上舉足輕重，點解惟獨得安達臣發唔到圍？第一個原因，可能同成長有關。唔講安達臣，其他金童最後都被安排在自己最舒服的位置，而整隊球隊都圍繞呢位金童而建構，結果非常明顯：美斯不在話下，阿古路、巴神成為攻擊重心，法比仔中場的指揮能力發揮到盡。無奈，由波圖加盟曼聯的安達臣原本應該打10號攻擊中場的位置，偏偏另一位金童已經長期佔據呢度：朗尼。於是，爵爺犧牲咗安達臣，要佢打防中的位置，放棄佢可以成為新朗拿甸奴的成長契機。不過，質素唔差嘅安達臣都乖乖哋，打好一個自己唔熟嘅位置。不幸嘅係，之後佢都被傷患困擾，呢個就去到運氣層面了。3年來傷傷停停，大家都等緊佢變好、發揮潛力，而於兩季前的開局時佢做到了：同卡華利的化學作用令佢哋成為曼聯的新中場核心，二人的配合令曼聯當時表現非常對辦，爵爺都好放心俾佢哋一齊上陣，然而好景不常，佢嘅起飛再一次被傷患打斷，而卡華利嘅成長亦開始停滯不前。
安達臣曾經在2008年時講過，佢好想去意大利發展，佢認為意大利嘅足球係最有智慧嘅。而佢亦好想身在摩帥的大軍之下，亦好想為國米效力，就好似以前嘅朗拿度一樣。當然依家嘅佢仲未證明到自己夠班打國米，亦未能為摩帥垂青，不過唔緊要嘅，佢最後都去到意大利踢波，更重要嘅係唔好以為佢好大年紀，其實佢仍然嫩口，只得25歲，仍然有時間俾佢證明自己、俾佢打出身價。只係，當初選擇了曼聯可能係一個唔合適嘅決定而已。喺呢度，祝願金童安達臣一路順風，喺意大利成為可以與一眾金童得主比肩嘅偉大球員！