曼聯專區小評：紅魔已失最大武器---Fear Factor 精選

咩係恐怖？ESPN 嘅寫手Rory Smith咁講，佢話以前其他球隊對陣曼聯，如果入波先、領先咗，佢哋會好驚、會返自己半場防守，就好似魚仔感覺到水入面開始有泡泡咁，唔係普通嘅泡，係水開始滾嘅泡；又好似侏羅紀公園入面，啲人類見到水杯入面啲水好規律咁震動，就知道有唔尋常嘅事等緊佢哋：一啲好恐怖嘅事即將發生。佢哋會一窩蜂返到後半場防守，希望呢件恐怖嘅事唔會發生…當然，最後都一定會發生，就係曼聯反勝。不過，今季呢啲恐怖感已經蕩然無存。唔係我講，好多人都咁講…
http://www.youtube.com/watch?v=PsGjh6ul7mE
好似亨利就話：「我哋以前作客奧脫福，係一件好恐怖的事。我可以咁講，每次去到呢個比賽場佢哋一定係以龐大氣勢壓逼你嘅一隊。有啲隊伍甚至唔敢在自己半場傳波，在自己半場都係大腳清就算數。不過今時唔同往日，隊伍去到曼聯唔再驚，佢哋打得好舒服，好安然咁就傳到波。你問我佢哋點先會返嚟？只要佢哋重拾fear factor，紅魔就會返嚟。」

曼聯的死敵韋拉亦有一致的意見：「新領隊去到曼聯，需要好多時間去改變爵爺嘅影響，去打出新領隊想要的風格。不過呢個過渡期會令佢哋好難過，而要處理呢件事已經足以令曼聯無哂fear factor。好似阿仙奴咁，佢哋已經唔會再好似以前咁驚作客曼聯。」

熱刺中場迪比利都係咁講：「爵爺走咗，一眾紅魔一定有心理上的改變。佢哋會諗，『爵爺唔喺到喇，無人會再驚我哋，我哋要做多啲嘢先得。』」咁，即係話佢都認為無人…最少，少咗人會驚曼聯。
就連蘭尼，佢都咁講：「好奇怪，其他隊伍同我哋比賽時，好似都比之前有信心，我估因為佢哋已經唔再驚我哋。我知道，我哋全隊都未係最有信心咁出戰，所以我哋一定會變得更好，有改善的空間。」

只有一個人唔係咁睇…莫耶斯話：「我哋無唔見到噃fear factor。我知，爵爺好叻，好有經驗、好有過去，佢在場一定會令紅魔的fear factor增加。不過，真正體現fear factor嘅始終都係場上嘅球員，既然人腳都無變，點解會唔再恐怖呢？」

不如你都係面對現實啦，有時恐怖呢樣嘢有就有無就無，當你面對一隊充滿恐怖因子嘅球隊，你嘅防守會出錯、你嘅射門會偏差，明明你可以防守到嘅位置都會怯一怯，去唔盡，就咁輸波。呢個好明顯就係上年曼聯成為反勝專家的原因，因為大家都知道落後嘅曼聯有幾恐怖。亦可以解釋到，點解曼聯的歐戰表現唔好，因為於本土大家都驚你，出到國就唔係咁嘅一回事，係實力嘅對碰。
歐聯無弱旅，今季曼聯可以在歐戰打出唔錯的成績，係因為曼聯爛船有三分釘，球員其實有一定的質素。不過在本土打唔出好成績，好明顯就係心態、同俾唔到「驚恐體驗」對手。而首要做的，就係要解放返曼聯最恐怖的攻擊力先，即係…放生雲佩斯…
(詳情請睇：曼聯專區小評：再談戰術 雲佩斯是如何被廢的)