The Class of '92首映禮 六星盛裝出席行紅地毯

The Class of '92 再次聚首一堂！唔係一齊踢波，而係一齊行「紅地毯」！英國當地時間上12月1日，曼聯92黃金一代成長紀錄片“The Class of '92”在倫敦舉行隆重首映禮，盛裝出席嘅當然有碧咸、傑斯、史高斯、尼維利兄弟同畢特啦！

如果畢士比寶具係畢士比爵士的心血結晶，咁92一代的曼聯小將就係爵爺一手調教出嚟嘅親生仔！睇住呢套影片，大家唔單止回顧92黃金一代光輝歲月，亦可以實實在在感受到爵爺對英超比賽的影響力！6位主角，碧咸、傑斯、史高斯、尼維利兄弟同畢特，喺爵爺栽培下一步步成為曼聯的主將、一步步成為世界聞名的球星，亦捧起一個又一個獎盃，成套片真係非常催淚架！
而12月1日，倫敦李斯特廣場就舉行咗一個隆重首映禮，六位男主角型爆全場，仲攜帶家人行上紅地毯，同一眾荷李活巨星的待遇有得輝架！當然，焦點好難唔放喺最最最靚仔嘅碧咸身上啦！佢嘅黑西裝上特登掛上一個紅線扎成的胸花，帶住老婆維多利亞同三個囝囝上台。三個囝囝嘅西裝上都有爸爸嘅紅色胸花，真係靚人靚景！史高斯、畢特以及菲臘仔嘅屋企人都有出席架。
首映禮上仲有好多體育名流現身，包括阿仙奴傳奇隊長、人稱「阿仙奴先生」嘅亞當斯、倫敦奧運會跳遠金牌得主盧瑟福(Greg Rutherford)等等。而娛樂圈巨星亦大不乏人，One Direction樂團成員哈利仔(Harry Styles)、利安(Liam Payne)都有嚟，當然啦，同碧咸好熟嘅地獄廚神哥頓藍斯(Gordon Ramsay)都有捧場！當晚大家就在衣香鬓影的氛圍之下，睇咗一次The Class of '92嘅成長喇！

90後偶像哈利仔！One Direction樂團成員
地獄廚神哥頓藍斯！