萬人迷再撐莫帥：球會前進步伐不會停 精選

睇住曼聯被卡迪夫追和，但又突然在歐聯大勝一場(雖然利華古遜表現水準之下亦是原因之一)，令人感覺曼聯的表現飄忽、時好時壞，好似仍然未過適應期咁。不過碧咸就唔係咁睇，佢認為曼聯全隊已經開始融入莫耶斯的戰術體系，已經過咗陣痛期。

佢咁講：「我唔認為呢場大勝係球隊改變的信號，因為過去幾星期我哋已經見到球會嘅改變，球員們表現越來越好，已經同新領隊融合埋一齊。如今嘅曼聯，隊員更加自信、更加想贏波。你可以好易睇得出呢一點，亦能感受得到。莫耶斯係一位偉大教練，在愛華頓取得好大嘅成功，無論係比賽場上、隊伍團結，佢都做得好好。

我好多年前就已經識得佢，當時我哋一齊在普雷斯頓踢波，我好清楚他係一個決心十足嘅人。佢深得球員愛戴，肯定會取得成功。不能否認，爵爺退休之後，曼聯肯定會有一個過渡期，但正如爵士所言，曼聯就係曼聯，我哋係打不死嘅。重要球員嘅離開，唔會影響球會前進的步伐；同樣地教練嘅離開亦都一樣。費格遜將永遠喺曼聯的史冊上留下美名，不過依家莫耶斯先係球隊主帥，由球員嘅團結度你就睇得出佢好適合做呢個位。」
萬人迷咁講都不無道理，因為呢場波已經係50年來曼聯在歐戰場上，作客入波最多的比賽之一。(當然唔計當年7球屠狼的主場賽事啦！)莫耶斯依家手上有副好牌，最大的工作反而係令曼聯重拾穩定性，只要做得到，紅魔就可以keep住勝軌喇！