爵爺自傳朗尼驚驚 紅魔靈魂續約與否仍是未知之數 精選

首先祝賀朗尼28歲牛一！希望你今年入多啲波、攞埋英超金靴、英超助攻王，同埋捧走歐聯！(聯賽呢…唔好諗太多喇！)不過隊中皇牌生日，你估下班隊友送咩俾佢？無錯！創意無限嘅紅魔一隊，決定送費格遜爵士新鮮出爐、炙手可熱嘅新自傳一本俾佢！你話好嬲定好笑？

呢本嘢對朗尼而言都幾「敏感」架！在歐聯比賽之後，少不免有記者問佢點睇本自傳，朗尼就咁講：「新教練打開我人生新一頁，我好享受同莫耶斯一齊工作！我哋都努力想取得成功，成隊都對成功都充滿渴望。爵爺有自己嘅觀點，我無必要講咩，但我真係好感謝佢澄清我無正式遞交轉會申請。佢退休之後我都未見過佢，不但對我而言，球隊成績先最重要，我唔想關注其他事情住。」
朗尼：我唔想再見到嗰個人。傑斯：咪咁啦...
睇落答得好大體，不過朗尼的小動作出賣咗佢！《郵報》話，朗尼受訪時一邊講一邊「搔首弄耳」，一刻都無停落嚟，而英國身體語言專家歌德就咁分析：「朗尼講場比賽同講爵爺時，身體語言完全唔同！一開始佢好輕鬆自在，呼吸平穩；但記者一問到爵爺自傳，朗尼就開始唔自在，欲言又止、臉紅，感覺受到威脅，喺動物界成日見到呢個身體表現，意思就係『我唔應該被攻擊！』。佢唔係政客，唔擅長面對呢種局面。」可見，佢同爵爺真係有啲嘢，如果爵爺唔退，朗尼好可能會走。

不過老實講，依家的情況都唔係咁樂觀，因為狀態正佳嘅朗尼其實仲未續約。ESPN援引《太陽報》消息，話曼聯有信心同朗尼續約4年，不過朗尼自己對續約點睇？外間一直都傳言，佢仲想考慮一下先會決定續約與否。佢越遲續約，曼聯要「賤賣」佢、以防人財兩空的機會就越大。朗尼，希望你收到爵爺的自傳做禮物的同時，都諗諗自己之後想點啦！