爵爺又派tips 「更衣室」主宰球場勝利 精選

曼聯在爵爺的手上成為長勝之師，除咗佢有自己一套長遠的建立球隊模式，更加有一套勝利隊伍的特別心得。呢個特別的秘訣，在於「更衣室」入面。爵爺在每日鏡報的訪問中，就講出咗呢個心得：

「講到更衣室入面，你要注意嘅有三件事：職業操守、忠誠、哲學。無論咩時候，你都必須要一致，就好似唱歌必須唱同一個調一樣，而且個唱腔幾衰都好，都要跟足。呢個好重要，要你嘅人認同你、知道曼聯嘅比賽方式，你就必須一致。更衣室嘅控制做得好就可以得天下，對我而言，我好慶幸我有個好好的更衣室文化。

我自己認為，依家嘅人比起30年前脆弱咗好多。我可以咁講嘅原因，因為我知道佢哋嚟自更好嘅成長環境。比起以前，我已經收咗好多火，唔係因為我老咗，係我唔可能好似以前咁發脾氣，依家班球員會頂唔順。

再加上，依家的英國足球都唔同咗好多，因為好多國外的球員都嚟到呢一到打波。曼聯自己，就已經有差唔多20幾個國籍的工作人員，呢個真係一個大挑戰，因為每一個人嘅文化、諗法你都必須好好照料。你必須確認佢哋過得好、過得安心，因為足球係一個結果為本的工業，你必須令每一個人都在最好的狀態。」
智慧老人又袋錢落大家袋，話俾大家聽咩先叫勝利。其實呢個道理唔難理解，人同人之間固然有差別，不過單計體能、球技，人人其實都差唔多，你好難先搵到可以一個打兩個嘅高手，就算美斯、c朗被兩、三個球員全力緊逼都會好難發揮。所以作為一個團體運動，保持隊員良好的心理質素、加強隊友之間的默契、同對領隊的絕對服從，才是最有效的戰術。