香川：後備太多已經影響國際賽表現 精選

其實球員士氣同領隊有好大關係，就以香川為例，佢又再一次借國際賽的時間向莫耶斯表達自己無正選打的不滿。而佢今次係直接講，在後備席的生活已經影響緊佢嘅國際賽表現。

在日本對陣白俄羅斯之後，佢就同傳媒大吐苦水：「個人而言，我認為為日本上陣呢兩次對我好重要，我感覺自己更為強韌。我知道我有需要多啲比賽，而作為一個團隊，我知道日本隊有好多事情必須完成，我亦在呢兩場比賽獲益良多。我認為我哋應該帶住呢兩場波學到嘅嘢返去日職或者我哋所隸屬嘅歐洲球隊，去解決我哋所面對的困難。當然體能係好重要，而為國上陣都有好唔同的氣氛。同曼聯的氣氛唔同，不過無論氣氛點，只有長時間打正選先會有好的球感。可能我仍然未喺球隊打返起狀態，唔係好慣出場，又或者其他原因，總之我唔太適應到比賽。」
今年香川真司只為曼聯正選上陣三次，而9月28日至今都未曾出過場。而計計埋埋，今季佢只在英超打過45分鐘的比賽。睇到呢到，筆者認為莫帥的選擇同最近香港一件大事都有啲似：你越想睇？我越係唔俾你睇！當全亞洲都期待香川可以成為星仔之後另一位紅極的曼聯球員，莫帥偏偏唔肯用；當全香港都期待某一間電視台可以正名、攞牌，偏偏大家都睇佢唔到…唔係打聯賽，香川打緊歐聯比賽咋...

忍痛又好，唔忍心都好，筆者真心希望一月香川可以返去多蒙特…你開心，曼迷都會開心！只因，依家曼聯的成績已經唔係曼迷的快樂源頭。見到自己喜歡的球員攞到應得的待遇，比強留佢在唔開心的地方好得多。