大衛撐大衛 萬人迷高呼要支持莫耶斯 精選

莫耶斯的前隊友碧咸表示，佢對莫帥有非常大的信心…吓？隊友？佢哋一齊踢過波架咩？唔係呀化？講堅架！嗰隊波叫做北普雷斯頓！莫耶斯的職業生涯去到最尾一段就係效力北普雷斯頓，由1993-1999年。而萬人迷碧咸曾經在1994-1995年外借北普雷斯頓加強經驗，所以兩位曼聯的代表性人物其實曾經係隊友！

講返碧咸啦！佢仍然撐莫耶斯噃：「當費爵爺退休，成績下滑是必然出現的。邊個嚟接班爵爺？一個曼聯新帥來執教會出現咩情況呢？曼聯仍舊會好似過去20年咁強大？我確信佢哋會，因為呢隊係曼聯。現在曼聯只係進入轉型期，無論邊個接棒都必須面對陣痛、一定有打得唔好的時間。我認為大衛莫耶斯是好好的教練人選，佢可以帶領曼聯取得成功。」

在英超前6輪比賽取得2勝1和3負，曼聯排名甚至一度滑落到積分榜下半頁，創造了24年以來「聯賽最差開局」的尷尬紀錄。如果無贊奴沙為曼聯止一止血、防止二連敗，曼聯的輸波可能陸續有來。最大件事，係不少曼聯球迷仍質疑莫耶斯的執教能力，畢竟相比起上季的奪冠陣容，曼聯今夏仲多咗個費蘭尼，不進反退的成績確係令人心灰，而原因，筆者都分析過太多了。

在11月11日對阿仙奴之前，曼聯未來3個聯賽對手分別是修咸頓、史篤城同富咸，係曼聯取分的好機會，亦係莫耶斯穩定軍心的最後機會，之後就要惡戰北倫敦雙雄。好就好在，與曼聯親近的人士都大力支持佢，好似爵爺、碧咸，就連朗尼都開口話不能怪莫帥，打得唔好要怪自己。可見，莫帥其實已經好努力，亦受到一定程度的「內部支持」，希望經過微調之後可以改善成績啦！
莫：多謝支持！朗尼：無嘢嘅，同一條船嘛！