曼聯專區小評：曼聯成功變身歐聯豬油膏 精選

老實講，筆者真係唔想批判莫耶斯，新帥都唔支持隊波真係好難打落去…不過睇完昨天一場歐聯比賽，確實係火都嚟…單睇比數好似勢均力敵，實情是費蘭尼的無力傳波對手解圍唔到，由韋碧克執雞。全場比賽只有可憐的4個攻門，仲要兩個來自史摩寧的頭鎚，兩位前鋒可謂完全無用武之地。

今場比賽，曼聯的進攻毫無組織可言，全靠兩邊球員的突破；左路韋碧克無壓力下控波都自然甩波，反擊毫無威脅；身後的艾夫拿亦是難以助攻。形容得更準確一啲，今仗曼聯打雙左閘，因為韋碧克的防守工作做得比進攻更好。右路，華倫西亞一次斬波都無見過。反而後面的拉斐爾有助攻，雲佩斯的惟一攻門就係佢俾波的。由此見到，左右的中場球員無力助攻反而打中間、鞭長莫及嘅左右閘竟然比中場更有威脅。

既然左右路攻力被壓制，中路呢？卡域克、費蘭尼、卡華利，都唔係中路突破的能手。反而後備席中有香川真司、邊路有蘭尼，都是可以創造機會的能手；最少前者擅於靈活突破、交波，後者斬波有板有眼。不過最後佢哋都坐足成場，而出場嘅，係曼聯的台柱級球員傑斯。已經年近40的傑斯體能已非當年，出場之後紅魔毫無起色。最後傳波、角球、射門所有的數字都唔夠對手，只有犯規數字比對手多一倍。

戰果咁難睇、咁核突，根本原因不能不怪莫耶斯。比賽一開始，莫耶斯就擺出絕對防守的姿態，在領先後不思進取、下半場得到控球權之後係原地控波、不作反擊…..慢節奏、控球至上、保住勝果，一切一切都睇得出莫耶斯的保守。相比之下，昨晚歐聯拜仁大勝曼城時的大開大闔、完全無因為對手係千億大軍而猶豫、全力進攻，今時今日的曼聯就似係食咗豬油、攬住過去輝煌歷史固步自封的老伯伯一樣。

鬧完，就要驚。筆者好驚一月轉會市場，香川、小豆全部走哂。