曼聯專區小評：費蘭尼是強化紅魔中場的關鍵！ 精選

有傳佢係第九號愛人，唔係曼聯的首席收購目標；有傳佢原本可以平400萬鎊…不過點都好，苦追法比仔失敗、失去靴拉里之後，莫耶斯只能將中場希望放在昔日愛將費蘭尼身上...不過大家都唔駛太擔心，雖然佢唔算得上妖人級中場、亦唔可以同奧斯爾、法比加斯的級數相提並論，不過講到質素，佢對曼聯的助益其實一啲都唔細。

先講風格，硬朗、如鐵一般的意志，費蘭尼將為曼聯提供久違的力量同肌肉強度，可以令紅魔中場硬淨好多。而中場的頭鎚搶截、身位硬碰佢一啲都唔輸比其他隊伍的「打仔格」球員如耶耶托尼、迪奧堤等等。上季費蘭尼爭奪頭鎚的成功率高達59.7%，每場贏夠4.9次，超越曼聯任何一名球員，包括最強的轟炸機維迪（4.2次）。佢甚至有5個頭鎚入波！而佢上季共80次犯規，是英超第二高的數字，表面上唔係一個好有紀律的球員，不過佢嘅抗爭心係無容置疑，為曼聯的中場注入強悍的風格，對中場爭奪有一定的好處。

而佢近兩年的後上助攻能力亦係英超中非常亮眼，上季在英超賽場攻入11球，每場均有2.9次射門。曼聯入波最多的中場中球員是卡華利，不過都只係攻入兩球，而曼聯所有中場中球員上季的聯賽總入波數字加加埋埋亦只有可憐的5球，比起翼鋒入10粒、左右閘9粒，甚至後衛的7粒更少。雖然要減除愛華頓、曼聯的風格不同，不過費蘭尼的威脅亦足以令對方分派一定人手去應對，減輕前線的壓力。
從不敵利物浦的比賽睇到，曼聯的確缺少一位能夠完成後排進攻、連繫中前場的中場球員。雖然紅魔能夠掌握住控球權，不過單箭頭的雲佩斯被對方後衛糾纏住，難以發難。朗尼的在陣點解會放生雲佩斯、甚至係韋碧克的原因，就係因為朗尼好有效咁連接住中前場、亦引走咗好多對手的防守球員。所以筆者雖然認為費蘭尼唔可以稱得上係神級的引緩，不過作為中場的新力軍，佢確有能力一改近年曼聯「軟腳蟹中場」的死症，為朗尼、雲佩斯分擔好多防守工作，專心向前。