雲佩斯：我老豆係...藝術家！

小豆老豆都係踢波嘅，仲有個花名叫「豌豆」，所以仔仔先叫「小豆」！咁既然犬子無虎父，咁曼聯新魔王雲佩斯嘅老豆又係何許人呢？大家唔好失望，因為佢爸爸以前同足球一啲關係都無，皆因佢係一位…藝術家！

卜‧雲佩斯 (Bob van Persie) 就係羅賓雲佩斯嘅老豆，佢係荷蘭國內都幾有名嘅藝術家，最擅長嘅就係做現代雕塑，用舊報紙、廢物嚟整藝術品。而佢媽媽都唔簡單，係一位畫家兼珠寶設計師。身在藝術世家，雙親當然都好想囝囝做一個藝術人啦！不過最後雲佩斯都係「不務正業」，無繼承到父母嘅專業…又或者咁講，喺另一個角度睇，雲佩斯用另一個方式表達咗佢嘅藝術細胞，就係用佢嘅腳法同足球天賦！單睇上季佢同朗尼合力泡製嘅經典球不著地入波，可觀程度唔會比藝術品少幾多！
作為藝術家，佢嘅父母都有藝術家嘅脾氣，雲佩斯5歲時父母已經離婚，而雲佩斯嘅童年就係同爸爸一齊過嘅。雖然囝囝無從事藝術工作，不過佢喺足球嘅成功亦inspire 咗Bob van Persie嘅Creativity，由唔睇波去到成日睇囝囝踢波，最後仲成為個仔嘅忠實粉絲！而佢融入一眾球迷入面之後，亦從球迷角度創作唔同的藝術品，如似用廢棄的報紙同舊雜誌整成球迷嘅「頭」，再俾個三角形佢做身，砌砌下就砌咗張聲勢浩大嘅球迷打氣圖喇！做咗40年藝術家、又喺荷蘭業界深得好評，佢決定要打入英國市場，第一站就係去曼市搞展覽！

呢個展覽會喺9月13日至10月5日舉行，地點係曼市的Richard Goodall Gallery。既然地點又係曼市，個仔又係曼聯球員，Bob的作品有好多都同紅魔有關係！如果有巴打絲打去開曼市，記得去捧下呢位藝術家場喇！