加利仔：痴咗線嘅人先會賣朗尼！ 精選

車仔已經確定再出價斟朗尼，而當中又發生好多事，好似：莫耶斯擬似講大話，話朗尼有傷；維迪、雲佩斯出嚟撐朗尼留低等等，不過現役英軍副教頭加利尼維利就用分析角度，道出曼聯絕不可賣朗尼的原因！

佢咁講：「呢一刻如果曼聯賣朗尼，佢哋一定係痴咗線。佢同雲佩斯嘅組合係英超最強，睇助攻數字、入波數字，都見到佢哋係近5年來英超中最有效鋒線組合。上年，大家可能都感覺朗尼表現未達標，不過唔好忘記佢打過中場、左右翼，仍然有22球入波同助攻。佢對球隊的貢獻大家有目共睹，你唔可能搵到人取代佢嘅獨特個性。依家嘅足球好少有人咁有個性，超強感染力、天生戰士，你唔會買得到呢啲獨特性。要搵人代替佢、入同樣數字的入球同助攻可能得，不過佢為曼聯帶嚟嘅嘢無人可以取代。我咁講，佢係英超呢八年來最重要的球員。過去八年，佢差唔多場場比賽都打足，贏最多嘅錦標，佢嘅成功無人可以取代。入球助攻20次以上、每一腳都盡力去追去攔截，都係佢點解成功嘅證據。」
提到朗尼搞到氣氛咁僵，留低可能影響表現時，加利仔就咁講：「幾年前佢都試過想走，大家一定記得。當時都搞到好大件事，公眾都談論，不過佢留隊之後仍然全力助球隊奪標。如果曼聯決定唔賣佢，我認為朗尼可以做到同樣的事，做好一個足球員的責任。佢係一個街頭戰士，有踢街波嗰種不惜一切嘅精神，佢好努力、好想踢波、好想做好自己，係對自己嘅專業非常重視嘅人。所以呢一刻，我見唔到任何要賣佢嘅原因，因為無人可以代替到朗尼。」https://www.youtube.com/watch?v=2HijfrtgrcI呢個combo 真係無人能敵！
離開轉會市場完結仲有：18日