曼聯專區小評：韋碧克可以替代朗尼？ 精選

呢兩年，睇「黑帝」韋碧克踢波大家可能都會睇到好忟：打前鋒，好似起親腳都唔中龍；打邊，速度夠就夠喇，不過網民戲稱韋碧克做「韋逼甩」真係好貼切，對手只要稍稍壓逼就好易可以搶到韋碧克腳下球，或者係撞甩佢個波瓦解曼聯的控球權。不過睇完社區盾，就睇到韋碧克原來仲有一個位可以打，仲好啱佢：影子前鋒！

上年的影子前鋒當然要數朗尼，佢身在雲佩斯身後，得閒又帶下波上前、得閒又交下靚波，自己仲可以攻上前射門，為隊友鋪橋搭路組織攻勢。今仗無咗佢，不過就指派咗韋碧克打呢個位，而結果竟然出奇地好！呢場波佢交咗39腳波，只係得4腳交失，連結中場同前線其實佢做得好好。當然啦，要佢放長波、射門當然唔夠朗尼咁好，不過作為一個輔鋒的位置，佢嘅位置感、交波都幾好，加上腳長長，好多時可以攔截到對手的交波，瓦解對方反擊之餘，由對手的後半場就已經開始反擊。

更重要嘅係，打輔鋒可以令佢嘅弱點無咁表露無遺：易甩波，不過打輔鋒可以交波交密啲，咁就無咁易甩；長傳唔準，不過佢嘅短傳好準；射波唔係咁中龍，佢可以俾雲佩斯完成工作。所以話，佢當然唔可能完全代替朗尼，不過作為攻擊中場，除咗香川真司之外，佢都係一個好好嘅人選！仲可以放返小豆或者香川拍雲佩斯，鋒線應該ok無問題！不過講到尾，韋大帝如果可以加強把握力就更好啦！

順帶一提，沙夏的打法筆者認為同韋碧克都幾似，以盤扭及速度為主要武器，所以相較起上來準繩度、身體拒性都比較低，保護皮球的能力亦唔強。不過佢有個好處，就係天生打翼，佢在邊線的威脅比韋碧克大，可以是華倫西亞、楊格等人嘅替補，亦可以進一步緩和韋大帝的壓力，唔駛佢成日充當左右翼。希望咁對韋碧克的成長有幫助啦！