曼聯改球會徽章？？ 精選

無錯！傳聞曼聯會改球會徽章！仲係新CEO活華特的意思！佢咁講：「我唔鍾意之前曼聯球會徽章嘅改動。就連格拉沙家族都唔鍾意，所以我哋會諗下，睇下改唔改。我哋係一個球會，唔係一個商業機構。」

點解要改？改啲咩？唔好嚇我哋呀…大家唔駛擔心，講緊嘅只係加個字入去啫！加咩字？就要講下故仔先，原來曼聯的球會徽章入面原本係有”football club”兩個字架，不過1998年嘅時候就拎走咗。過咗十五年光陰之後，格拉沙家族為咗要表明自己唔會賣曼聯嘅決意，亦想表示出曼聯係一隊球隊，會專心喺賽場而非商業活動，佢哋希望重新將”football club”兩個字加返入去球會徽章入面。以前係咁架！

活華特仲話：「不過不能否認，我哋都要好多商家支持先可以維持隊伍嘅強大。所以我哋會搵個平衡點，確認我哋球會嘅重要性同商業活動可以取得平衡。格拉沙家族將會長期擁有曼聯，同我哋嘅股東一齊支持曼聯。依家佢哋入主咗8年，我認為喺可見將來都唔會有改變。」
老實講，有無”football culb”兩個字喺會徽入面都唔重要，重要嘅係格拉沙家族想借此「洗底」，希望以加字嚟一洗金錢掛帥的味道。不過格拉沙家族以曼聯為吸錢機還債係不爭嘅事實，無論做咩都改變唔到…依家咁睇，佢哋仲會留喺到好一段時間，睇嚟曼聯球迷只有接受一途了……
有啲嘢，係唔係加返個字就可以當無事發生？