曼聯專區小評:邊個話一朝天子一朝臣?

曼聯專區 於 05/07/2013 發表 收藏文章
講嘅當然係新嘅莫耶斯班底啦!不過之前唔係話佢唔理舊情,將一眾曼聯的staff更替哂咩?點解咁都唔叫做一朝天子一朝臣?皆因真章依家先出現,莫耶斯銳意重現嘅係一個「有曼聯特色的新班底」!

一眾舊部如Meulensteen、龍門教練Eric Steele嘅離開,大家都預期到曼聯的教練團隊風格會有大變,其實有唔少球迷都好擔心曼聯成為第二隊愛華頓。不過新消息令筆者鬆一口氣,原因係莫耶斯引入咗拍檔菲臘尼維利之外,仲有一個令人振奮嘅消息,就係指派咗傑斯成為球員兼任教練,呢個令莫耶斯的版圖更為明確:佢要好好運用兩老的經驗同識見去帶領曼聯,更明確一啲,係要佢哋保持爵爺嘅勝利傳統!

好似菲臘仔,佢為曼聯上陣咗接近400次,無錯佢嘅腳法雖然唔係同儕中最好,不過佢經驗老到,雖然主力打後衛,不過中場都打過,而且強大嘅位置感令佢同哥哥成為曼聯陣中可靠嘅左右閘。而考獲UEFA B牌嘅佢都有執教經驗架,因為佢都教過英格蘭U-21!佢咁講:「我退役時我已經知道我會在綠茵場上繼續工作,因為我前幾年已經為此而準備緊。所以莫耶斯搵我正正完咗我心願。」而傑斯,雖然未有執教經驗,不過作為曼聯的長青樹,佢睇過嘅、經歷過嘅,實在是曼聯的最大瑰寶之一。最重要嘅係,如果話二人係傳承咗爵爺嘅經驗一啲都不為過,因為佢哋就係陪住爵爺不斷奪標的球員之一。

有佢哋嘅建議,莫耶斯就可以重現一直以來曼聯的風格,而呢個由曼聯名宿所組成嘅戰線亦令一眾紅魔粉絲安心唔少。呢一刻,backroom staff的問題可謂暫時放低,而下一步當然就係球員!今晚就會有莫耶斯入魔的第一個記者會,唔知係宣佈朗尼留隊,定係艾簡達拿入魔呢?一齊期待啦!
傑斯:你點架?朗尼:一陣你咪知囉
標籤: 莫耶斯  菲臘尼維利  傑斯  

留言


請按此登錄後留言。未成為會員? 立即註冊
    快捷鍵:←
    快捷鍵:→